I-Day Parade Contingent zirlai te harsatna tawh thin sutkiansak tum ila

Kumtina kan hman thin India-in zalenna a hmuh champha Independence Day chu kan lo hnaih leh ta a, District hrang hranga he ni lawm dan tur pawh hi rel chhoh mek a ni a, vawiinah hian Serchhip-a Independence Day hman dan tur pawh sawiho a ni dawn a ni.
National Day hmannaah hian a kum telin school parade contingent zirlaite mual chhunga an din laia tlu an tam chho telh telh niin a lang a, nikum khan Aizawl-ah zirlai naupang pakhat chu Independence Day lawmna Parade inbuatsaih laiin a boral a, hemi hnu phei hi chuan zirlaite rilru-ah hlauhthawnna nasa tak a intuh emaw tih tur a ni ta a, hei hian anmahniah pawh nghawng a nei emaw chu aw tih theih a ni.

Zirlaite hriselna dinhmun a inchen lo a, thenkhat tana awlsam taka paltlang theih kha thenkhat tan a tawrh zawh loh ve thei a, tin, zirlai te zahzum dan pawh a inchen lova, thenkhatin an tawrh zawh loh tur hria a, an insaseng mai ngam laiin, thenkhat chu an insaseng ngam loh avanga tluk phah ta mai te pawh an awm theiin a rinawm a ni.
Aizawl-ah chuan Independence Day lawmnaa zirlai naupang parade a tel turte chu doctor ten an hriselna uluk taka endik hmasak theuh nise tiin, July thla ni 17 leh 21 chhunga endik hman vek turin meeting chuan a ti a, endik lohte chu tel tir lo se an ti a, Serchhip-ah pawh hei hi tih theih se a duhawm hle a, chumai bakah zirlai naupangte taksa-in a tawrh loh theih dan tur bera Parade kalphung pawh siam theih nise a duhawm khawp mai.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram