Sawrkar hian Elementary School a ngaihthah tawh dawn em ni?

Tunhnai kum engemawti kalta aṭang khan Mizoram sawrkar hnuaia Elementary School te chu an tlahniam chak hle a, School engemawzatah phei chuan zirlai naupang an neih mumal loh vangin School khâr ngai te pawh a awm hial a, hetihlai hian Kohhran leh Private School te erawhin Zirlai an ngah chho telh telh thung a ni.

Kan rama zirna tlahniam chho zel hi hriain sawrkar chuan Education Reforms Commission te dinin, he Commission-in zirna chawikanna atana sawrkara rawtna a thehluhte chu tihhlawhtlin tuma hmalak chhoh mek niin sawrkar hotuten an sawi a, chutihlai chuan Mizorama Elementary School te hi thuam ṭhat emaw, mipuite chhawr ṭangkai theih tura tuaithar leh tumna hi a awm lo emaw ni aw tih ngaihdan a awm mek a ni.

Sawrkar School-a zirlai te hian monthly fee chawi te an nei lova, sum sên a tlem zawk bakah sawrkarin hamṭhatna hrang hrang a siam ṭhin avangin mi harsa zawk leh private school dang awm ve mang lohna thingtlanga mite tan chuan chhenfakawm tak a ni a, chuvangin, sawrkar hian Elementary School te hi mipuite tana chhenfakawm leh tun hma anga an chhawr ṭangkai leh theihna tur hian hma la se a duhawm khawp mai.

Hetih mek lai hian sawrkar school tihtawp tak hmun ṭhenkhat te chu Education Department leh pawl dangten School ni lo, thil dang dinna hmunah hman an tum niin hriat a ni a, hei vang hian sawrkar hian mipui tam takin an mamawh Elementary School lam hi tuai thar leh hmalakna thar neih a tum tawh lo em ni aw? tih ngaihdan a awm thei a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram