September ni 10 kha Mahni Intihhlum Vênna Ni (World Suicide Prevention Day) a ni a, he ni hi Pathiannia a tlak avangin Mizoramah chuan nimin khan he ni pual hian hun hman a ni a, International Association for Suicide Prevention leh World Health Organisation te hmalaknain khawvel pumah mahni intihhlum tumte chhanhimna kawnga hma kan sawn theihna tura inzirtirna hun atan hman a ni.

Mithiam leh zir bingtute sawidanin, mahni intihlum te hi an intihhlum chhan tam ber chu ruihhlo vâng te, ngaihzawng vâng te, an thil tum an tih theih loh vang te, damlohna-in a tlak buak vang te leh retheih luat vang te niin sawi a ni a, heng te hi an intihhlum chhanah puhsak ni mahse a dik tak zawkah chuan an rilru natna hriatpui tak taktu leh an rilru natna thawidam tura puitu an hmuh loh vang a ni zawk niin a lang.

Mithiamte chuan mahni intihhlum duhna khawp thinlung put hi natna (disease) chi khatah an ngai a, mahni intihlum tam ber hi rilru hah (depression) nasa tak an neih vang a ni tlangpui tih an sawi. Hei vang hian mahni intihhlum tum te hi vên theih an ni a, Doctor-ten taksa natna an enkawl dam theih ang bawkin hetianga mahni intihhlum duhna khawp rilru natna nei te pawh hi an natna enkawl dam theih an ni ve tho tih hria a, rilru lam Doctor te râwn nachang hriat hi kan mamawh nasa hle tawh niin a lang.

Tin, Mahni intihhlum tum vènna kawngah hian kohhran leh khawtlângin ṭan kan lâk a ngai hle tawh niin a lang a, chhungkaw tin pawh hian hemi kawngah hian zir tur kan nei nasa hle a, mahni intihhlum chungchangah hian tun aia nasa leh tam zawka inzirtirna kan mamawh tawh a ni.