Categories
Editorial

Bawlhhlawh sawngbawlna hmun chungchang kha


Nimin khan Serchhip ṭhalai Pawl chuan thuchhuah siamin, Serchhip mipuite tui tlan mek, Tuikum lui hnâr lama bawlhhlawh sawngbawlna siam mek chungchangah UD&PA Department hotute hmu-in helaia bawlhhlawh sawngbawlna hmunah hian mihringte tana himlo tur thil hrang hrang pe chhuak lo tura bawlhhlawhte sawngbawl theih a nih dawn loh chuan helai hmuna bawlhhlawh sawngbawlna din tura hmalak mekna hi tawpsana, hmun dang zawng mai turin thuneitute an ngen tih an sawi a ni.
Helai hmuna bawlhhlawh sawngbawlna din tum a nih lai khan social media lamah sawi neuh neuh a awm a, a siam tumtu lamte pawh khan hmundang an zawng tih sawi a ni a, hetihlai hian hmun dang ṭha an hmuh loh avang leh helai hmuna bawlhhlawh sawngbawlna siam hi a him nia an hriat zui tak avangin tunhnaiah hma lak a ni ta a ni.
Hemi chungchang hi thuneitu leh khawtlang hruaituten an ngaihven zui a ṭul hle niin a lang a, kan bawlhhlawhte aṭang hian mihring natna thlentu, natna hrik tam tak leh tûr chi hrang hrang a chhuak ṭhin a, heng bawlhhlawh aṭanga mihring tana thil ṭhalo chhuak lo tura bawlhhlawhte sawngbawl a nih theih chuan kan tui tlan hnâr lama bawlhhlawh sawngbawlna dah hi a ṭhat lohna a awm lo niin a lang.
Hetihlai hian helai hmuna bawlhhlawh sawngbawlna dinna atana sawrkar sum tam tak senral a nih hnuah he thil hi hman ngam loh a ni leh hnuhnawh mai ang tihte pawh thil hlauhawm tak a ni a, Serchhip ṭhalai Pawl-ten an hlauh ber, helaia bawlhhlawh sawngbawlna hmunin Serchhip mipuite tui tlan a tihbawlhhlawh theih leh theih loh tur chungchangah hian PHE Department lama mithiamte pawh zirchiantir ni thei se, helaia bawlhhlawh thlite Tuikuma a luanluh palh pawha PHE Department lamin mihring ei leh in atana him tura an tihthianghlim theih dawn chuan helai hmuna hna thawh mek hi chak taka kalpui zui zel ni se, chuti ni lova PHE Department-in an tithianghlim thei dawn lova an inhriat erawh chuan sum tam tak senral a nih hma hian helai hmuna hna thawh pawh hi tihtawp a ṭha zawk mai thei a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram