Mipuite i harh zel ang u

Tunhnaiah Serchhip khawpui chhung kawngpui (NH-54) khuar lai chu lei hmanga hnawh a ni Inrinni thleng khan lei hmanga kawng hnawh hna hi thawh a ni a, hei hi mipui tam takin duh lovin nasa takin an sawisel a, New Serchhip North VC phei chuan an area chhungah lei hmanga kawngpui hnawh hi an phal ta lo nghe nghe a. Hemi chungchangah hian a tuk, Pathianni-ah Sub-Hqrs. YMA, Serchhip hruaitute chuan kawng siamtu company hotute an kâwm a, company lam chuan hnathawk tur an hmuh dawn chuan alkatra hmang kawngpui an siam theih tur thu an lo hrilh a ni.

Hetianga kan khawchhung kawngpui ṭha zawka siam a nih theihna atana hma latu Sub-Hqrs. YMA hruaitute an fakawm a, chutihrualin, tun ṭumah hi chuan mipui lam pawhin kawngpui ṭha zawka siam a nih theih nan tha an thawh nasa ve hle niin a lang a, chu chu lei hmanga kawngpui siam an duh loh thu nasa taka kan au chhuahpui kha a ni a, a lawmawm takzet a ni.

Mipuite hian hei hi kan hriat a ṭul – kawngpui siam chauh pawh ni lo, kan khaw chhunga sawrkar sum hmanga hmasawnna hnathawh, sawrkar sum hmanga thil siam reng reng hi a khaw mipuite tana siam a ni tih hi kan hriat a ṭul a, mipui chhawr tur, mipui tana thil ṭangkai tur siamna atan sawrkar sumte hi ruahman ṭhin a ni tih kan hriat thar a, sawrkar sum hmanga thil siamte mipuite tana chhawr tlâk loh emaw, mipui tana ṭangkai lo tur leh, mipuite tana harsatna siam tur zawnga siamte hi mipuite hian kan en liam mai mai loh a hun tawh hle. Kan duh loh zawng leh kan tana ṭhalo tur zawnga sawrkar sum hmannaah mipuite na zawka kan au chhuah ngam a ṭul takzet a ni.

Tun ṭuma kawngpui siam chungchangah pawh nasa takin mipui kan au chhuak a, lei-a kawng an hnawh tuk lawkah Alkatra hmanga kawng an siam theih tur thu kan hre nghal a ni a, hemi chungchangah hian Sub-Hqrs. YMA hruaituten hma an lâk mai bakah nasa taka mipui phun thawm a awm a, hei hian Sub-Hqrs, YMA hruaitute hmalakna pawh nasa takin a tihchak phah niin a lang a, chuvangin, mipuite leh khawtlang hruaitute kan ṭanrual thiam zel chuan nasa zawkin hma kan sawn theih ngei a rinawm a ni.