Editorial: Bawlhhlawh senghawi

Lawngtlai District chhung Hruitezawl Village Council huam chhunga Bawinu (Kolodyne) luia hmun pakhat, Lungmak/Lungmawi chu tunlaia khualzinte’n an tlawh ṭhin avangin leh, he hmun mawina leh hlutna te chawisan zel a nih theih nan leh ṭha taka humhalh a nih theih nan te, a tlawhtute tan pawh a lo him zawk nan te Lawngtlai District Magistrate chuan Bawinua Lungmak/Lungmawi tlawh tura kal reng rengte chu mahni bawlhhlawh fai taka senghawi leh vek turte, bomb/dynamo/generator/tur hmanga sangha man lo turtein thupek a chhuah a, thupek zawmlote chu dân anga hrem an nih tur thu a tarlang bawk a ni.

Mizorama Environmentalist tam takte sawi nasat ber chu hmun mawi leh nuam deuh, tuten emaw an tlawh pawh aṭanga mi tam zawkin an hriat ve hnua, tlawhtu an tam apiangin hmun ṭawp takah a chang thuai ṭhin niin an sawi a, hemi awmzia chu, a tlawhtu tam takin bawlhhlawh an hnutchhiah nasat ṭhin vang a ni.

Mizoramah hian tlang thlengthaw nuam leh mawi tak takte, lui/kawr mawi leh nuam tak tak kan nei tam hle a, heng kan hmun neih tam takte hi chu a panna kawng mumal awm lo leh a panna nuam lo tak takte a nih avangin mipui nawlpuiin kan tlawh pawh theih loh leh kan tlawhpawh ngai loh hi a tam zawk an ni hial ang.

Hetihlai hian tunah chuan lirthei neite kan tam tawh a, a panna kawng nuam deuhte chu kan tlawhpawh nasa ta hle a, heng hmun nuam leh tlawh nasat deuhte hi a enkawltu mumal an awm loh chuan bawlhhlawh (thil eina kawr ruak leh sarang etc.) a tam thei hle. Mi engemawzatina bawlhhlawh an kalsan tlingkhawm chu a lo tam tham tawh ṭhin a, reiloteah hnawksak tham a ni a, kha hmun khan a mawina leh a nawmna a hloh phah thuai ṭhin a ni.

Kan ram nuam leh mawi tak hian a nawmna leh mawina an hloh mai loh nan mipuite hian khawi i loa kan chhuahvahna reng rengah kan bawlhhlawhte hawn lêt leh ṭhin ila, kan hâwn lêt theilo a nih pawhin kan bawlhhlawhte chu keimahni ngeiin kan senghawi leh kan tihriral zel hi a ram neitute kan nih anga kan mawhphurhna a ni tih i hre thar ang u.

Leave a Reply

This site uses Akismet to reduce spam. Learn how your comment data is processed.