Editorial: Mahni himna mahni kutah

Nimin khan SAD Conference Hall, MINECO-a Health Minister Dr. R.Lalthangliana hova Mizoram Covid-19 dinhmun thlirhona (review meeting) neihah Covid-19 vanga inkaihhruaina hman mek chi hrang hrangah inthlahdul hret rel a ni a, February thla aṭangin Pathianni chhuna inkhawm pawh kalpui ṭan leh tawh turin an rel a, Pawl 10 leh 12-te pawhin January ni 22, 2021 aṭangin School an kal ṭan leh tawh dawn a, hei bakah hian chhiatni ṭhatnia mihring kal phalsak chin pawh tihpun rel a ni a, zan curfew pawh thlahdul ṭha tih a ni bawk a ni.

Khawvel puma hri leng mek leh mi tam takin an thihpui tawh, Covid-19 hri lêng avangin hun engemawchen chu tunhmaa kan kan nun dan phung pangngai angin mipuite kan khawsa thei tawh lova, he hri laka kan himna tur ngaihtuahin sawrkar chuan kawng hrang hrangin mipuite khuahkhirhna a siam a, a châng phei chuan pawna chhuahte thlengin phal loh chang a awm ṭhin a, hri kai ve lote pawhin kawng hrang hrangin he hri lêng hi kan tuar a tih theih âwm e.

Amaherawhchu, hetianga nunphung pangngaia kan awm theih loh chhan hi Covid-19 hri leng laka mipuite himna atana tih a ni a, heng khuahkhirhna hrang hrangte ṭha taka kan zawm avangin ram dangte ngaihtuahin he hri leng hi kan tawrh nasat ve loh phah ni pawhin a hriat a ni.

Tunah chuan kan ramah hri leng hian ziaawm lam a pan tak avangin sawrkar pawhin inkaihhruaina leh inkhuahkhirhna ṭhenkhatte thlahdul turin hma a la chho mek a ni a, hetihlai hian mipuiten kan hriat atana ṭul tak chu, sawrkarin inkhuahkhirhnate a thlahdul avang hian hri lêng hi a reh dawn ta tihna a ni lo tih kan hriat a ṭha âwm e.

Sawrkarin inkhuahkhirhna a duante a thlahdul hunah hian mimal tinin he hri lêng laka kan himna tura kan mawhphurhna hi a sâng sawt dawn ti pawhin a sawi theih ang a, chuvangin, he hri damdawi a awm hma leh, hri danna (vaccine)-te kan dawn ve hma hi chu hri lêng laka kan fimkhurna hi kan thlahthlam loh mai bakah, sawrkarin min vênpuina tam tak a thlahdul dawn avang hian mahnia nasa zawka kan invên a ṭul chho dawn ta tih kan hriat a ṭul hle a ni.

Leave a Reply

This site uses Akismet to reduce spam. Learn how your comment data is processed.