Editorial: Politician-te kawih her theih ni lova, politician-te khalh ngiltu nih tum a hun tawh

February thlaah Aizawl Municipal Corporation (AMC) inthlan neih a ni dawn a, hemi hnu hian Serchhip bialah MLA by-election neih a ni dawn bawk a, heng inthlanna lo awm tura tlin ngei tumin political party hrang hrangten tunah hian hma an la mek a, campaign pawh an bei ngawrh chho hle a, an thu leh hla leh, an inbeihnate pawh nitin chanchintharah chhiar tur leh ngaihthlak tur a awm chho leh mek a ni.

Serchhip bial pawh MLA by-election neihna tur a ni a, tun aṭangin political party hrang hrangte campaign thawm hriat tur a awm chho mek a, campaign pawh an rawn bei ngawrh chho telh telh dawn a ni.

Political party-te hian inthlan an hmachhawn hian ṭan an la nasa a, inbeih pawh an inbei nasa thei a, hetianga an inbeihnaah hian politician-te hian mipuite hmin an tum luatah thu dik tawk lo leh thu belhchian dawl chiah lo sawi châng an nei fo niin a lang.

Hetianga inthlan dawna political party-te inbeihna karah hian mipuite hian rilru fim tak kan put a ṭul hun tak a ni tih kan hriat a ṭul a, politician tam takin thu dik tawk lo leh thu belhchian dawl lo emaw, sum leh therhlo engemaw hmang mai maia an kawih pên theih tawk leka min hmuh lohna turin, sawrkarin puitlinga a ngaih, vote nei thei tawh chin hi chuan inthlanna kan neih turah ngun taka ngaihtuahna kan sên hi kan mawhphurhna a ni tih hria ila.

Tuten emaw thuneihna an chan duh vanga hmanraw thianghlim lem lo hmanga kan rilru an kuai her thei zel a nih chuan kan ram chhiat leh hmasawn loh chhanah mawhphurtu kan ni ve thei tih pawh hi kan hriat a ṭul a, ram tana ṭha leh ṭha lo turte thliar thiam ve thei tura kan hriatna tihzauh kawngah pawh ṭan kan lâk a ṭul takzet a ni.

Political party-te chuan lalna chan ngei hi an tum a ni ber a, chumi tur chuan hmanraw hrang hrang an hmang fo a, hetiang karah hian mipuite hian kan ramin hma a sawn chuan a hlawkpuitu tur chu mipuite bawk kan ni dawn tih hi kan vawn tlat a ṭul a, politician-te kawih her mai mai theih ni lova, politician-te khalh ngiltu zawk ni thei tura kan intuaihriam ve hi a hun tawh hle a ni.