Ei leh bara intodelh

Nikum kum tir lam aṭangin Covid-19 hripui lêngin India ram nunphung a khawih buai ṭan a, India ram state dangte ngaihtuahin he hri hi Mizoramin kan tuar har viau chungin sawrkar laipuiin inkharkhip (lockdown) a puan avangtein Mizoramah pawh kan nunphung a khawih buai hma hle thung.

He hri lêng avang hian ei leh bara intodelh ṭulzia mipuiin nasa takin kan hriat thar phah a, nikum lamah pawh kum danga buh leh thlai ching ngai lo engemawzatin hma an la a nih kha.

Tun hma aṭang tawhin ei leh bara intodelh tum hian sawrkarin hmalakna hrang hrang a lo kalpui tawh ṭhin chungin a hlawhtlinna hmuh tur a la awm hlei thei lova, kan ei leh bar tur leina atan nitin ram pawn lamah sum tam tak kan la pe chhuak ruih ruih reng a ni.

Ei leh bara intodelh hi ramin a mamawh bulṭhut hmasa a ni a, chutihlai chuan ei leh bar kan mamawh zawng zawnga intodelh vek erawh thil theih a ni lova. khawi ram mahina an tihtheih loh a ni. Ram dang aṭanga ei leh bar engemaw ber chawlut lova awm thei ram hi khawvel ram hrang hrang zingah hian an awm kher âwm love. Amaherawhchu, ei leh bar mamawh tam taka intodelh ramte chuan ram dang aṭanga an mamawh leina atana sum tam tak an senral tur kha an hum thei a, chu chuan an ram a tichangkang ṭhin a ni.

Hun reilote chhungin engahmah a intodelh thut theih loh tih hi thil chiang tak a ni a, intodelh thut thei lo mah ila, a hmasawn zawnga kan kal bek bek zel thei a nih chuan engtikniah emaw chuan kan mamawh zualpuia intodelh theih hun hi chu kan la nei ngei dawn a, intodelh kan duh a nih chuan kan theihna chin china hmalak chu kan tihmakmawh a ni thung.

Hei, kum bul kan ṭan mek a ni a, thlai chin lamah pawh hma thar lak theih hun a la ni mek a, thlai chin theihna ram/hmun neite hi chuan kan chhungkua-in kan ei ṭhin ṭhenkhatte hi kan chhungkaw ei khawp tur tal ching vek thei ila chuan ram dang aṭanga kan ei leh bar tur lakluhna atana sum kan sen ṭhin tam tak hi a tihtlem phah ngei a rinawm a, hetianga chhungkaw hrang hrangin tlemte tea hma kan lâkna infinkhawm hi kan ram intodelhna leh, kan ram ṭhanna tur kawnga ke kan pen theihna pawimawh tak a nih ngei a rinawm.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram

This site uses Akismet to reduce spam. Learn how your comment data is processed.