Mizoram sawrkarin Covid-19 No Tolerance Drive hman mek kalpui chhunzawm zel tura thupek a tihchhuah bawhzuiin, Serchhip District Magistrate chuan Serchhip Town area chhungah, vantlang hmunah leh hnathawhna hmunah mihring 5 aia tam punkhawm khapna leh, Serchhip Town area chhungah, zan dar 8 leh zing lam dar 4:30 inkarah pawn chhuah khapna thupek a tichhuak a ni.
Thupek chhuah a nih hian a zawmtu tur chu mipuite kan ni a, Covid-19 No Tolerance Drive neih chhung phei chuan thupek hi a kengkawhtu turten an kengkawh ṭha hle a, hun engemawchen kalpui a nih tawh hnuah pawh dân bawhchhia nitin man an la nei reng a, dân bawhchhiat vangin kohhran meuh pawh pawisa chawitir an ni nghe nghe a nih kha.
Thupek bawhchhia hi man tur la awm reng mahse mipui nawlpui chuan sawrkar thupek tihchhuahte kan zawm ṭha tlangpui niin a lang a, hetihlai hian sawrkar thuneitu lam hian thupek zawm ṭhat hi an ngai pawimawh lo zawk em ni? tih theih turin Chief Minister telna programme pakhat pawhin sawi zui a hlawh hle a nih kha.
“Dân hnuaiah chuan mitin inangkhat vek kan ni” tih ni mahse thupek kengkawhtute tan chuan mipui nawlpui leh sawrkar hotu lawk tak takte leh mi challang tak takte laka ang khata thupek kenkawh hi thil harsa tak niin a lang a, hei hi sawrkar hotute leh mi challang (public figure)-te hian an hriatchian a ṭul hle a ni.
Nihna leh thuneihna neih vanga dân leh thupek kengkawhtuten an man dawn lo tih hriat vanga dân leh thupêk palzût hian dân leh thupêk kenkawh zuina leh kawng dangah nghawng ṭha lo tak a chhuah thei a, hetianga chete hi dân leh thupêk kengkawhtuten man kher lo mahse mipui thinlungah dân an bawhchhiat thu hi a reh chuang lo a, hei vang hian mipui tam takin dân leh thupek palzut an pawisak loh phah thei a ni. Chuvangin, sawrkar hotute leh mi challang (Public figure)-te hian mipui enthlak reng an ni tih hria-in, dân leh thupêk mipuiin an zawm ṭhat nan anmahni ngeiin dân leh thupêk an zawm ṭhat hmasak hi a ṭul hle niin a lang.