Ramria buaina hi

Tunhnaiah Assam leh Mizoram ramriah buaina a awm leh a, tunhma aṭangin ramria buai a awm apiangin kan ram humhim kan duhnaah Mizoram mipuite kan lungrual viau zel ṭhin a, thil lawmawm tak a ni.

Assam nen hian ramriah hian vawi duai lo buaina kan nei tawh a, ramria buaina kan neih apiangin state pahnih sawrkar hotu liante pawhin inbiakna an nei fo ṭhin a, mahse tun thlengin kan ramri tihchianna tur kawngah hian hmasawnna hmuh tur a la awm lo hle thung.

Tuna kan sawrkar hrawn mekin sawrkarna an chelh hnuah, nikum khan ramriah buaina liantham a thleng a, sawrkar kal tawhte zawng zawng aia ṭhain ramriah hma an la nia hriain, mipui fak pawh an hlawh hle a, mipuite pawhin ramri chungchangah tuna kan sawrkar hrawn mek lakah hian beiseina sâng tak pawh kan neih phah a nih kha.

Hetihlai hian tun hnaiah Assam lam hian police chakna nen Mizote hmunhma tam takah hma thar an rawn la leh a, kan luah ṭhin hmun ṭhenkhat pawh min chhuhsak niin sawi a ni a, hetianga Assam sawrkarin ramria rawn invalh zau belh a, ram an rawn la zel thei a nih chuan, Mizoram mipuite hian kan ramri buaina hi chinfel a, kan ramri tur tihchian thuai duh viau mah ila, Assam lam hian ramri chinfel mai hi an duh ve maiin a rinawm loh a ni.

Mimal leh pawl, political party hrang hrangten âw an chhuahna aṭanga a landan chuan ramri humhalh duhnaah hian Mizoram mipuite chu kan lungrual viau niin a lang a, chuvangin, mipuite leh sawrkar hian kan ram chin nia kan ngaihah hian a chhung aṭanga venhim tum ringawt lova, a invalh zau zawng leh a nawrtu lama ṭan dan kan zawn ve a ngai tawh niin a lang.

This site uses Akismet to reduce spam. Learn how your comment data is processed.