Nimin khan Faina Hapta chu khâr a ni ta a, hapta hman chhung hian faina kawnga hmalakna tur hrang hrang inzirtirna neih a ni a, kumina Serchhipa Faina Hapta kan hmannaah hian inzirtirna thar kalpui a awm nual a, chung zingah chuan – bawlhhlawh thliar hran, bawlhhlawh ṭawih thei leh ṭawih thei lo thliar hran te, plastic lam chi a hranga dahkhawmte leh, bawlhhlawh hman nawn theih ang chi hman nawn dan zawnte a ni a, hei bakah hian plastic pan chi/polythene lam chi hman tlemte pawh a tel a ni.
Faina Hapta kan hman ṭhin hian faina kawngah hmasawnna min thlen ṭhin a, chutihrualin faina kawngah hian hmasawnna tur tam tak erawh kan la nei a, Faina Hapta hlawhtlinna chu faina kawnga inzirtirna kan neih ṭhinte a taka kan hman ṭangkai zui danah a innghat a, kumina faina haptaa faina kawnga hma kan sawnna tura inzirtirna thar kan neihte hi faina piah lamah kan environment humhimna kawnga thil ṭul leh kan tih makmawhte a nih avangin a pawimawh zual hle a ni.