Tunlai khawvelin a buaipui ber mai, Covid-19 hri lêng chu mithiamte sawi lawk angin a thawh thumna a thleng chho leh mek niin a lang a, Mizoramah ngei pawh ni khatah sang tel hri kai thar hmuhchhuah an awm chho leh ta mek a, hetihlai hian mi tam tak chuan he hri leng mek hi ngaihzam a ngaih tawh thu leh tlang hri leng, hritlang chi khat anga ngaih mai a ṭul tawh thu an sawi ṭhin a, amaherawhchu, he hrileng hi mi hrang hrangah a thawhdan a inang lova, ṭhenkhatin an lak nat vak loh laiin, thihpui pawh an la awm zel a, chuvangin tlang hri leng chi khat anga ngaih mai hi chu thil theih loh niin a lang a, khawvel ram hrang hrang sawrkar pawhin he hri leng hi an la ngai thu tak hle a, chuvangin, mi tam takin an sawi anga ngaihzam mai chi hi chu a la ni lo niin a lang.
Tuna kan dinhmun en phei hi chuan he hri leng hian Mizoram min nuai na chho telh telh niin a lang a, hri leng thawh hnihna ai khan hri kai kan pung chak zawk a, hri leng thawh hnihnaah khan ni khata hri kai tam ni ber thleng tur khan thla 6 chhung vel hri kai punna hun kan hmang a, tun ṭumah erawh chuan hri leng thawh hnihnaa hri kai tam ni ber khûm nan thla khat erh awrh chiah hun kan hmang a, tunah pawh a hniam zawnga kal lovin, a pung zawngin kan la kal zel rih a ni a, chuvangin he hri leng hi ngaihzam ngawt chi a la ni lo tih a chiang hle a ni.
Hetiang hi kan dinhmun a nih avangin mipuite pawh kan insanmar a, hri leng laka fimkhurna lamah ṭan kan lâk a ṭul hle tih kan hriat a ṭul a, sawrkar pawh hi tun aia he hri leng do tura a insawr bing leh hret hi a ṭul leh rih niin a lang.