Nimin khan Serchhip District chhunga hmun 18 zet chu Covid-19 hri leng mekah dinhmuna hlauhawma ding tiin, Red Zone-ah puan an ni a, heng hmuna hri lengte hi khuahkhirh a nih theih nan ni 7 chhung atan heng hmun khuahkhirhna tur pawh tihchhuah nghal a ni a, Serchhip District chhunga hmun 18 zet Red Zone-a puan a ngai hian hri lengah kan District dinhmun chu a la ṭha tawk lo hle tih a tilang chiang hle awm e.
Hetianga Red Zone-a puante hi District thuneituten an duhdan leh âwm an ti vanga an puan ngawt a ni lova, heng hmuna ni 7 chhunga hri kai pun dan an chhinchhiahna aṭanga WHO-in inkaihhruaina a siam dan zui zuiin Red Zone-a puan ngai hmunte hi chhut chhuah a ni a, chuvangin, mithiam zawkten uluk taka an zirchian hnua hri leng hlauhawm theihna hmun chhut chhuah tur an duan dan zulzuia chhut chhuah a nih avangin, hri darh zel tur venna atan Red Zone-a puan hmunte hi ngaihthaha en liam ngawt chi a ni dawn lo a ni.
Sawi tawh ṭhin angin, hri leng darh zel tur do kawngah hian mipuite kan inthlahdah tawh hle mai a, sawrkarin inkhuahkhirhna khauh taka kalpui chi-a a ngaih tawh loh avangin inkhuahkhirhna dul deuh zawka a kalpui chungin mipuite chu fimkhur tura ngenna a tichhuak reng a, mahse, mipuite hian inkhuahkhirhna dul deuh hnuaiah hian keimahni kutzalah fimkhurna kan tum lo hle niin a lang a, hei hi tuna hri leng la hluar zel chhan pawh ni berin a lang. Chuvangin mipuite hian he hri leng laka kan zalen thuai theih nan tunah hian kan zalenna hi kan hmanthiam a ṭul a, kan nitin khawsak phungah fimkhur taka nun kan hman chhoh a ṭul rih hle niin a lang.