Serchhip District Hospital building thar sakna tur atan Power Grid Corporation of India Ltd. (PGCIL) chuan CSR aṭangin cheng vaibelchhe 21 pek chhuah an remti a, District Hospital building thar hi khum 100 len theihna atan sak a ni dawn a ni.
Serchhip District Hospital building thar sak tur chungchang hi hunrei tak aṭangin Serchhip mipuite sawi a hlawh tawh hle a, sawi a hlawh chhan ber pawh tuna damdawi in awmna hmun hi a khaw ṭhang zel atan a ṭha tawk lo a, a chêp thuai dawna ngaih a nih avangin Congress sawrkar (term hmasa zawk)-ah khan Tarpi tlangah damdawi in building thar chu sak tum a niin, khatihlaia Chief Minister Lal Thanhawla chuan kum 2011 March thla khan a lungphum pawh a phûm hman a, mahse a hmun chungchanga buaina a awm tak avangin an tumna hmunah sak theih a ni ta lo a, tun thlengin damdawi in building thar chu sak lohin a awm zui ta zel a ni.
Hmunhma ṭha zawka damdawi in sak duhna kal zelah Serchhip Town NGO Coordination Committee chuan kum 2020 September thla khan Serchhip town chhunga VC hrang hrang aiawhte ko khawmin, joint meeting chuan Chhiahtlang ram, Bukpui P&E deptt leh ITI tura buatsaih inkara ram âwl chu District Hospital building thar sakna atan hian lungrual takin an pawm a, amaherawhchu, tun hnaia Serchhip Ṭhalai Pawlin RTI hmanga an zawhna chhannaah Serchhip damdawi in chu a hmun ngaia sak turin ruahmanna a awm thu hriat a ni ta a ni.
Hetianga a khaw neituten nakin hun thlir chunga damdawi in hmun hma ṭha zawk neih duh vanga damdawi in hmun sawn tura lungrual taka thu an tihtluk tawh laia sawrkar department lamin mipui duhdan lo zawnga ruahmanna an siam zui zel hi an hnathawhsak mipuite zah lohna niin a ngaih theih âwm e.