Nimin khan Lawngtlai District Level Committee on Myanmar Refugees chu a ṭum hnih nan an Chairman, Lawngtlai Bawrhsap Dr Andrew H. Vanlaldika hovin an ṭhukhawm a, heta tarlan a nih danin, tun dinhmunah Lawngtlai District chhungah Myanmar aṭanga raltlan lo lut mi 5,300 chhinchhiah tawh an ni a, raltlante chet vel dan uluk taka vil zui a nih theih na’n an mimal chanchin nen uluk taka chhinchhiah hna kalpui mek niin, raltlante hi ID card pe vek tura ruahman a ni a, tunah hian ID Card 98 siam tawh a nih thu tarlan a ni.
Myanmar rama sipai sawrkarna tundin a nih hnuah Myanmar mi leh sa tam tak chuan an sahimna zawngin an ram an chhuahsan a, Mizoramah pawh engemawzat an rawn lût tawh a, Mizorama rawn lût tam zawk hi kan Zohnah-thlak unaute an ni a, India sawrkarin raltlan (refugee) dinhmun tun thlengin la pe lo mahse Mizoram sawrkar chuan kan unaute tiin, a lo pawm a, tlawmngai pawl leh kohhran thlengin heng raltlante tuamhlawm hna hi an lo thawk a ni.
Khawvel ram hrang hranga raltlan awmna hmunah pawikhawihna a pung ṭhin a, tuna kan rama raltlante pawh hi mize inang lo tak tak an ni a, mifel tam tak awm karah pawi khawih hreh lo inphum ru an awm ve thei reng a ni. Hei vang hian keimahni mai bakah raltlan zinga mi ṭha tam takte him zelna tur atan kan rama raltlan lo lutte uluk taka chhinchhiah leh vil zui hi thil ṭul tak a ni a, tun dinhmunah chuan raltlante chhinchhiah hna leh vil zui hna hi a chak lo hle a, tlawmngai pawlte hmalakna piah lamah hian sawrkar hian hemi kawngah hian chak zawkin hma la thei se a duhawm khawp mai.