Vawk hri leng (African Swine Fever (ASF)) vangin nikum lam khan chhinchhiah theih chinah Mizorama vawk 33,417 an thi a, ASF vang hian vawk 10,910 suat a ni hman bawk a, ASF vang heng thi leh vawk suat zawng zawng hlutna belhkhawm hi cheng nuai 345.77 vel zet niin chhût a ni a, nikum kum tawp lam aṭang khan ASF hri leng hi ziaawm ṭanin, hun engemawchen chu ASF vangin Mizoram chhunga vawk thi a awm thu hriat a ni lo a, amaherawhchu tunhnaiah Champhai Electric Veng chhunga vawk engemawzat thite thih chhan chu African Swine Fever a ni tih finfiah a ni leh ta a ni.
ASF hri hi vawkin an haw hle tih tawnhriat kan nei tawh a, he hri kai tawh chu an thi deuh zel a, vawk vulh lama hma la nasa chhungkaw tam tak zingah an vawk vulh lai zawng zawng chân vekte pawh an awm a, he hri tuartu vawk vulhtu ṭhenkhatte phei chu loan la a, lian tham taka hma la-te an ni a, an khawngaihthlak em em a ni.
He hri leng hi vawk vulhtute mai ni lo, sa zuara eizawng leh sumdawng tam tak pawh a nghawng a, an duh ang vawk talh tur an hmuh theih loh piah lamah vawk talh khapna thupekte tihchhuah a ni a, mi tam tak eizawnna a nghawng a, mipui thlengin min nghawng na hle a nih kha.
Hun engemawchen he hri hi Mizorama a len hnuah a reh chho ṭan a, mi tam tak chuan vawk vulh lamah hma thar an la leh mek a ni a, chutihlai chuan tunhnaiah Champhai lamah ASF vanga vawk thi an awm tih finfiah a ni leh ta a, he hri hi a thlen chin hriat a har nghal hle a, he vawk hri lenga tawnhriat kan neih tawh aṭangin he hri leng laka fimkhur a ṭulzia kan hre tawh a, ASF vanga Mizorama vawk thi an awm leh takah chuan he hri hi a darh zel lohna atan vawk hmanga sumdawng te, ran talhtute leh mipuiten ṭan kan lak nghal a ṭul hle a, sawrkar pawhin rang taka hma a lak a ṭul a ni.