Zothlifim Logo
Loading ...

Tunlai hian Mizoram District ṭhenkhat chu vawk pul hri hlauhawm tak, African Swine Fever (ASF) hri leng thawh hnihnain a nuai leh mek a, he hri lenna hmunah chuan nitin vawk thi engemawzat an awm mek a, hetihlai hian tun dinhmunah chuan Serchhip District chu a la rawn thleng lo niin a lang.

ASF hri leng hi nikum lamah kan tuar tawh a, vawk vulhtu tam takin an innghahna, an vawk vulh lai engemawzat an chân a, ṭhenkhat chu bul ṭan ṭhat leh harsa khawpa tuarte pawh an awm a, loan hmanga vawk vulh tam tak pawhin harsatna an tawh phah nasa hle a ni.

Hei mai bakah hian he hri leng avang hian mipuite pawhin vawk saah hun engemawchen harsatna kan tawh phah a, vawk vulh duh tan pawh vawk note a vâng hman viau a nih kha.

Kan hun kal tawha kan tawrhnate kha hre reng ila, khatiang tawrhna kha tawk leh thei dinhmunah kan ding mek a, tunah chuan kan la him rih niin a lang a, hetih hun lai hi kan invên fimkhur hun lai tak a ni a, AH & Vety Department leh District thuneitute pawhin he hri leng laka kan himna atan hian an theih ang anga hma la-in mipui zawm tur inkaihhruaina leh thupekte an tichhuak a, he hri leng laka kan him theihna atan hian mipuiten inkaihhruaina leh thupekte ṭha taka kan zawmtlan a ṭul takzet a, chutihrualin, sawrkar thuneitute leh khawtlang hruaitute pawhin fimkhur tura inzirtirna leh dân bawhchhiate vên kawngah nasa zawka ṭan an lak zual a ngaih hun lai tak a ni.