Assam leh Meghalaya chhunga hmun ṭhenkhatah tuilian leh leiminin rel kawng leh national highway-te a tihchhiat avangin Mizorama POL, a bikin petrol, chawkluh a khaihlak thei dawna hriat a nih avangin Supply Department Director chuan petrol mamawhtute’n rualkhai zawka an chan theihna’n petrol lak theih zat tur bitukna thupek a tichhuak a, hetihlai hian Supply director chuan nimin kan tuialhthei hi Guwahati-a mi by-road-a phurh tur a nih vangin a rawn thleng reng dawn tih a sawi a, chiaina tur a awm loh thu a sawi a ni.

Supply Director-in petrol petrol lak theih zat tur bitukna thupek a tihchhuah hnu hian lirthei neitu tam tak chuan petrol lak tumin pump hrang hrangah thui tak tak an intlar zui nghal a, petrol pump ṭhenkhat chuan petrol an kawl sa pawh a mamawhte hnena awlsam taka hralh mai tur an neih loh phah zui leh ta nghe nghe a ni.

Hetianga mipui mamawh chawkluh kawnga engemaw harsatna thleng thei a awm hian mipuite hi kan chiai hma ṭhin hle a, a tam thei ang ber mahni ina inchhekkhawl tumin ṭan kan la nghal a, kan mamawh aia tam kan lei phah fo a, hei hian mi tam tak harsatna a siam a, chumai bakah, inchhekkhawltute pawhin an mamawh aia tam lei nan sum tam tak an sen phah fo bawk a, harsatna kan insiam belh nasa ṭhin hle a ni.

Hetiang anga mipui mamawh lakluh kawnga harsatna hi kan lo tawk fo tawh ṭhin a, kan hun tawn tawhte thlirkirin, kan mamawh chawkluh kawnga harsatna kan tawh pawhin mipuiten harsatna leh manganna tawpkhawk kan la nei ngai lo a, sawrkarin a theih dan danin hma a la a, a ṭul chuan sawrkar laipui leh state dang sawrkarte pawh a dawr ṭhin a, chuvangin harsatna manganthlak tak kan tawk hman ngai meuh lo a ni. Chuvangin, mipuite hian harsatna lo thleng thei a awm pawhin keimahni leh keimahni harsatna kan insiam belh lohna turin chiai chiam chiam hi kan sim a ṭul hle niin a lang.