KṬP General Conference 2022 Kolasib Diakkawn Field-a neih chu nizan khan a ṭiak ta a, he Conference-a speaker thusawi chuan sawi zui a hlawh hle a, Inrinni zanah zu chungchang sawiin, sawi zui a hlawh nghal viau a, nimin lamah ram inrelbawlna, politics kaihhnawih chungchang a sawi leh a, a hma zana a thusawi ai mahin sawi zui a hlawh mah zawk emaw tih tur a ni.
Mi ṭhenkhat chuan kohhran leh politics chu a kal hrang tur a ni a, kohhran rawngbawltuten politics chungchang an sawi ve hi an tihtur a ni lo, ti zawngin an sawi a, ṭhenkhat thung chuan a kal kawp tur a ni a, kohhran hruaitute hian ram kalphung dik lo tur vêngin, ram hruaitute kal dik lo tur khalh ngil hi an tihtur a ni an ti ve bawk a ni.
Tun hma aṭangin Mizo mipui nawlpui rilru-ah hian politics leh kohhran hi kan kal hrantir ngar ngar niin a lang a, Kohhrana rawngbawltu zingah pawh politician engemawzat an awm chungin mi ṭhenkhat chuan kohhran rawngbawltu politician ṭhenkhat kan endan pawh hi a hê phah deuh ṭhin niin a lang a, hetihlai hian kohhran rawngbawltu politician ṭhenkhatte chu Kohhran rawngbawlna huanga an nundan dan leh Political field-a an nundan a lo inpersan viau ṭhin bawk a, hei vang hian mi tam tak chuan political field hi mi ṭha lote awmna tura ngaiin, kohhran rawngbawltute tana inrawlhna tur chi-a ngai lo pawh kan awm phah niin a lang.
Kohhran hian an mi leh sa kal sual tur vên hi an mawhphurhna a ni a, chuvangin, an kohhran mi leh sa-ten ram inrelbawlna leh kaldanah pawh thil ṭha leh ṭha lo an thliar thiam theihna tur te, an kohhran mi leh sa thuneitute kalsual tur vên leh khalh ngil bakah, kohhran miten duhthlanna dik an siam theihna atana zirtirna pekte hi kohhran rawngbawltute tih tur dik tak a ni a, tuna kan ram dinhmun en phei chuan hemi kawngah hian kohhran hi a la kal na tawk lo zawk em? tih hi ngaihdan awm thei tak a ni.