Zothlifim Logo
Loading ...

Union Minister of State for Railways and Textiles Darshana Jardosh chuan puantahna lama eizawngten thiamna (skill) an neih theih-na tur atana buatsaih ‘Samarth Training Prog-ramme’ Nilaini-a Thenzawla a hawnnaah puantahtute chu Mizoram chauh thlir lova ram dang mite duh tur puan tah tura chahin, India ram hmasawnna atana thawhpuiah a sawm a ni.

Union Minister-in a sawi ang hian puantahah chauh ni lovin, thil dangah pawh Mizoram pawna hralh tur thlir chunga thil siam / deh chhuah lamah hian tun aia nasaa hma kan lak a ṭul tawh hle a, hei hi kan ram hmasawnna tur leh, thil siamtuten sum tam zawk an hai luhna atana thil ṭul tak a ni.

Kan sawi ṭhin a, Mizoram hian ram danga hralh tur khawpa thil siam chhuah / deh chhuah hi kan la nei tlem hle a, kan state chhunga hralh tura thil siam chhuaktute hi chu kan awm nual tawh a, amaherawhchu, kan thil siam chhuah tam takte hi ram danga thawn chhuak tura ram dang miten an duh tur ni lem lo hi a tam zawk an ni a, chubakah, a siam chhuahna lian tham tak kan neih loh avangin kan thil siam tam zawk hi chu state chhunga hralh ral tham lek a la ni tlangpui bawk a, a kawng hmang hre deuh mi tlemte chuan tam tham lo takin ram danga thawn chhuahte chu an nei ve bawk ṭhin a, mahse hengte hian duhkhawp a la tling lo hle a ni.

Union Minister-in a sawi ang hian puanah chauh ni lo, kan thil siam chhuah dangah pawh ram dang mite duh tur chi thil siam chhuak tura ngaihtuahna kan sen a ṭul hle a, kan state hmasawnna atan ram danga thawn chhuah tur thil siam chhuah tam zawk kan neih hi a ṭul takzet a ni.