Skip to content
Home » Chanchinthar » Editorial: Sawrkar hna thawh leh hmalakna puanzar

Editorial: Sawrkar hna thawh leh hmalakna puanzar

Serchhip District Bawrhsap hna lo thawk tawh pakhat chuan Serchhip-a sawrkar Department hotute nen an inkawmhonaah Department hrang hrangten hna ṭha tak thawk nia an inhriat laiin mipuiten an hnathawh an hriat si loh chuan awmzia a nei thui lo ṭhin a, an hnathawhte mipuite hnena an hriattir chu an tih ngei ngei tur pakhat a nih bakah mipuite nen an inlaichinnaah inrintawnna a siam thei a, a pawimawh hle a ni a ti a, an hnathawhte media kaltlanga puanzar hreh lo turin a chah a ni.

Sawrkar chuan mipuite tana thil ṭha leh an hamṭhatna tur hrang hrangte duangin, sawrkarin ruahmanna a duante chu sawrkar hnathawkten tihhlawhtlin tumin hma an la ṭhin a ni. Hetihlai hian an hna thawhsak ber, mipuiten an tana sawrkar hnathawh hrang hrangte an hriat ṭhin loh avang hian mipuiten sawrkar ṭhalo leh sawrkar chaklo neiah an inngaih phah fo ṭhin a, sawrkar chu hnathawk chhe ta viauahte ngaih phahin, sawrkar hmalakna an thlawp ngei ngei tura ngaihte pawh thlawp nachang an hriat loh phah fo a ni.

Chuvangin, mipuiten sawrkarah rinna an nghah ngam a, sawrkar hmalaknate ṭha zawka an thlawp a, an tana hna thawktu sawrkar hnathawkte ṭha taka an thawhpui theih nan mipuite hi tun aia uar zawk hian sawrkar hmalakna te hi hrilhhriat an ṭul hle a ni.

Sawrkar hnathawk tam tak chuan hetianga sawrkar hna an thawhna puanzar ṭhin hi intihlâr tumnaah puhin, “Ṭha taka hna kan thawh chuan a tawk mai,” an ti ṭhin a, amaherawhchu, heng mite hian an hmalakna leh hnathawhte mipui hnena puanzar ṭhat hian kawng tam takin an hnathawhna kawngah a pui thei tih an hriat loh vang a nih loh chuan langtlang taka sawrkar hnathawh an duh lo-ahte pawh a ngaih theih ang.

Leave a Reply

This site uses Akismet to reduce spam. Learn how your comment data is processed.