Kumtina June ni 11-a Green Mizoram Day hman ṭhin chu kuminah pawh hman leh tumin inbuatsaihna kalpui mek a ni a, kumin Green Mizoram Day-ah hian tuihna humhalh leh tihpun lam ngaih pawimawh tum a ni a, kumina thupui atan pawh ‘Thingphun la, tui hna siam rawh’ tih hman a ni dawn a, nimin khan Serchhip District Bawrhsap-hovin, Serchhipa Green Mizoram Day hman dan tur pawh sawiho a ni a, Thenzawl Golf Course sir kual vela leilung luangral thei vênna atan leh a sira luang Vanva lui tui hna humhalh a nih theih nan a chhehvelah nasa taka thing phun ṭha an tih thu an sawi a ni.
Kum danga Green Mizoram Day-a thing kan phun tawhte pawh kha a ṭha vek a, khang kan thing phun tam takte kha mipuite pawhin chhawrna tam tak kan nei tawhin a rinawm. Kumina Green Mizoram Day-a thing kan phun chhan tur hi tui hna tihpun hisapa phun tum a nih avangin a ṭha zual hle a tih theih âwm e.
Thing phun ringawt hi a phunna hmunin a zir loh chuan tui hna siam belhna atan a ṭangkai ngawt lova, tui hna siam belhna atan chuan hmun khata thing phun ṭeuh a, ngaw ṭha tak siam hi a ṭangkai zual hle a ni. Kum dangah chuan khaw chhungah te, kawngpui dungahte thing kan phun a, khangte kha a ṭhat lohna a awm lova, amaherawhchu, tui hna siam tur atan chuan a ṭangkai dan a nep deuh a, tin, kan thing phunna hmun leh kan thing phun chi-in a zir loh avangin hmun ṭhenkhatah chuan an puitlin hnuah kan hnawksak a nih avanga kih leh ngai, a zar thlak kawlh reng ngaite a awm ṭhin a ni.
Kumina kan thingphunna turah pawh hian ngaw ṭha tak a nih zui reng theihna tur hmun, nakina suat leh ngai lo tur hmun ngei thing phunna atan pawh hian thlan nise, tin, khaw chhung leh kawng dunga thing kan phun dawn a nih phei chuan thei lam hi hi phun uar nise nakinah kan chhawr ṭangkai zual theih a rinawm.