Mizoram chhungah sawrkarin project eng eng emaw a kalpui mek a, Serchhipah pawh hmasawnna hnathawh eng engemaw kalpui mek a ni a, hetianga kan ram chhung leh khuaa hmasawnna hnathawh hrang hrang a awm hi thil lawmawm tak a ni a, chutihrualin, kan ram/khua hian eng hmasawnna nge kan mamawh hmasak tih erawh kan chhût ngun a ngai ta hle niin a lang.
Sawrkar hmalaknain Building bakah, retaining wall, side drain, infiamna hmunhma leh construction work hrang hrang thawh a ni a, thawh mek leh thawh zawh tawh te, hmachhawpte pawh a awm a, hengte hi kan ram tan hmasawnna ṭha tak a ni.
Hetihlai hian tuna kan ram mipuite dinhmun thlir hian sum thawh chhuah theihna tur, mipuiten sum hailuh nana an hman zui theih tur hmasawnna hna (Project/Scheme) lam hi kan mamawh hmasa leh kan bawh nat tur lam a ni tawhin a lang a, helamah hian mipui leh sawrkar lam pawh hian nasa zawkin rilru kan sên a ngai tawh takzet a ni.
Kan ramah sum tam tak sengin infrastructure ṭha tak tak tam tak kan din tawh a, mamawh pawh kan la nei ṭeuhin a rinawm. Chutihlai chuan Infrastructure ṭha pui pui leh changkang tak tak nei mah ila, kan ramin sum dehchhuahna ṭha kan neih loh chuan changkanna tluantling kan nei thei tak tak dawn lova, mipuite dinhmunin hma a sawn tak tak thei dawn lo a ni. Chuvangin, sawrkar emaw, mipuiten emaw sum kan hmuhlet theihna tur siam leh din kawngah hian tun aia nasa zawka ṭan kan lak a ṭul a, hemi kawngah hian khawtlang leh sawrkar anga ngaihtuahna nasa zawk kan sen a ṭul hle ani.