Kumin fur ruah surah Mizoram chhunga kawngpui hrang hrang laih zauh hna thawktu NHIDCL lamin dem an hlawh hle a, fur ruahtui tlak ṭan tirh khan kan lui tui a nut nasat avangin an leivung paih dan demna a nasa a, ruah a sur rei deuh a, an hnathawh ṭhenkhat a chim zui leh bawk a, sawiselna a pun belh leh a, hemi hma deuh hian Mizoram Pollution Control Board lam chuan an hnathawh danah insawifiah tura tihna lehkha an lo pe tawh a, a chhanna pawh NHIDCL lam hian thawn let tawhin, leivung paih chungchangah chuan an hnuaia contractor-te an mawhpuh a, hetihrual hian Environment Forest & Climate Change Department lam pawhin an hnathawh danah dan bawhchhiatna a awm tiin stay order an pek bakah an hna ṭhen dan sawifiah tura hriattirna an pe bawk a ni.
NHIDCL-te hian NH-54 kawng laih zauh hna hi kumin aṭanga thawk ṭan mai an ni lo a, kum hmasa lam aṭangin an lo thawk ṭan tawh a, Serchhip leh a chhehvelah phei chuan kawng laih ngawr ngawr chu an thawk zo ṭep tawh a, hemi rual hian kawngpui tihzauhna-in hna dang a ken tel pawh engemawzat an lo thawk tawh bawk a ni.
Heng an hnathawhte hi Serchhip Sub-Hqrs, YMA hnuaia Vigilance Committee-te chuan tlawmngaih chhuahin an lo enpui zeuh zeuh tawh a, sawiselsakte pawh an nei fo a, hetihlai hian YMA lam hi sawrkarin endik tura a ruat an nih loh bakah, anni tan an hnathawh dan tura ruahmanna awmsate thûk takin zuk hriatpui a har ṭa, tin, an hnathawh vil reng turin hun an nei lo bawk a, hetihlai hian sawrkar hian kan ram chhunga an hnathawh dan hi a hriatpui lo nge, viltu leh enzuipuitu tur a ruat lo zawk? Hna tam tak an thawh tawh hnuah, an hnathawh tawhnaah insawifiah tura hriattirna pek an ni ta chauh mai hi thil mak tak a ni a, a pawi tur ang tam tak a pawi tawh a, an hnathawh leh zel turah chuan sawrkar hian an hnathawh dan tur angin an thawk em tih vil zui thei tawh se a duhawm khawp mai.