Skip to content
Home » Chanchinthar » Editorial: Kuthnathawktute thlai thar hralhna

Editorial: Kuthnathawktute thlai thar hralhna

Sialhawk khuain an thar chhuah Lakhuihthei Kg. 230 chu Dubai, United Arab Emirates-a hralh turin Deputy Chief Minister Tawnluia’n Zirtawpni zing khan Horticulture Directorate kawtah a vai liam a, hemi hma, kumin June thla khan Tualte Tomato Growers’ Co-operative Society Ltd. thar chhuah tomato quintal 162 chu Silchar, Assam-a hralh chhuah turin Deputy CM hian a lo vai liam tawh bawk a ni.

Hetianga kuthnathawktute thlai thar chhuahte hralh tur ngaihtuahpui a, hmalakpui an ni hi kuthnathawktute tana thil lawmawm tak a ni a, a bikin Mizoram chhungah mai ni lo, ram pawn thlenga kuthnathawktute thlai thar hralhsak an ni thei hi a lawmawm lehzual a, hemi kawnga hmalatute pawh an fakawm hle.

Mizoramah hian hun rei tak chu kuthnathawktu/thlai chingtuten an thil hralh chhuah kawngah harsatna an lo tawk tawh thin a, an thlai chinte an thar tam deuhin a hralhna kawngah harsatna an tawk fo a, kuminah ngei pawh Mizoram hmun thenkhata Dawnfawh chingtute chuan an dawnfawh tharte hralhna kawngah harsatna an tawk a nih kha.

Dy. CM-in a bial chhung khuate Tomato leh lakhuihthei thar chhuahte hralhna kawnga hma a laksak hi thil tha leh lawmawm tak a ni a, chutihrual chuan, kuthnathawktute thlai thar chhuah tum khat hralhna tur mai ni lova, an thar chhuah apiang an hralh nghal zelna tur hi ngaihtuahpui ni thei se chu tun ai hian kan ram hian thar chhuah kan ngah lehzualin a rinawm a, kan rama thlai tharte a hralhna kawngah harsatna a awm a nih pawhin kuthnathawktuten tha thlawn an sen mai lohna turin thlai thar sawngbawlna tur din kawngah pawh chak zawkin hmalak ni thei se kan ramin thatpui ngei a rinawm a ni.

Leave a Reply

This site uses Akismet to reduce spam. Learn how your comment data is processed.