Skip to content
Home » Chanchinthar » Editorial: Training neih hmasak theih nise

Editorial: Training neih hmasak theih nise

Thawhṭanni zana Central YMA pisa-a Central YMA thuneitu sâng Central Executive Committee (2021-2023) ṭhukhawm chuan, ruihhloin Mizoram a rûn meknate thlir chungin Central YMA chuan ruihhlo do pawl, Central Anti Drugs Squad (CADS) din leh nise an ti a ni.

Hun engemawchen aṭang khan Mizoramah ruihhlo a hluar hle a, tun dinhmunah chuan ziaawm lam aiin nasat lam a pan telh telh niin, a lang a, kan ṭhalai tam tak ruihhlo bawihah an tâng mek a, chhungkua mai ni lovin, khawtlangin kan tuar mek a, hetianga Central YMA-in ruihhlo do pawl a din leh tur hi thil lawmawm tak a ni a, he pawl hi Mizoramin kan ṭhatpui leh ngei pawh a beiseiawm a ni.

Hetianga Central YMA-in ruihhlo do pawl a din takah chuan an hnuaia awm Sub-Hqrs., Group leh Branch-ahte pawh ruihhlo do pawl hi an din chho ve leh pawh a rinawm a ni.

Tun hmain Central YMA hnuaiah ruihhlo do turin SRS din a lo ni tawh a, khami rual khan Branch YMA-te pawhin ruihhlo do kawngah nasa zawkin hma an la a, an hnathawh rah kha Mizoramin a ṭha lamin a tel a nih kha.

Chutihrualin, khatihlaia hmalaknaah khan an member zinga che fuh lo an awm zeuh châng a awm avangin hming chhiatna engemaw an nei leh zauh ṭhin a, kha khan an hnathawh ṭha tam tak a hliah khuh phah fo ṭhin a ni.

Chuvangin, tuna YMA-in ruihhlo do nasa zawka kal chhohpui a tum meknaah hian hmalak tak tak hmain dân lam thiam leh he lama hma latu, Police leh Excise Deptt. lam aṭang hian hma lakna kawnga tha thawh turte hian he lam kawnga inzirtirna neih hmasak ni thei se kawng tam takah kan ṭhatpui theih a rinawm.

Leave a Reply

This site uses Akismet to reduce spam. Learn how your comment data is processed.