Skip to content
Home » Chanchinthar » Editorial: P&E Department hna thawk Civil mi 3-in nunna an chân hi

Editorial: P&E Department hna thawk Civil mi 3-in nunna an chân hi

Kar kal khan Lawngtlai district chhung, Rulkual khuaah Power line chhia siama Young Lai Association (YLA) hnatlang a thawk chhuak zinga mi 3 chu current man vangin an thi a, midang 2-in hliam an tuar bawk a, a pawi hle a ni.

Mizoramah hian Power line siamnaa current man vanga nunna chân an awm thu hi a khât tawkin hriat tur a awm leh ṭhin a, kar kaltaa vanduaina thlengah phei chuan a rualin mi pathum ngawtin nunna an chân a, a pawi hle a ni.

Heng thil thleng ṭhin hi vanduai vang ni mahse P&E Department hnuaia hnathawh laia Electric Current man vanga nunna chân an awm leh ṭhin hi hriatthiam a har tawh hle a, P&E Department-a hnathawktu ṭhenkhat fimkhur tawk loh vanga thleng ṭhin niin a ngaih theih a, hetianga department hnuaia hnathawk zinga vanduaina tawkte hi a nghet lova thawk leh, zirna lamah pawh Electric lama zirna mumal nei lo an ni lehzel ṭhinte hi ngaih thutak a ngai tawh takzet a ni.

Kar kaltaa vanduaina tawkte phei hi chu P&E Department hnuaia hnathawk pawh an ni lo a, YLA member, hnatlanga Power line siamtute an ni a, hei hian P&E Department tan pawh an hnuaia hna thawk lo leh Electric current chungchanga hriatna nei lote hna thawk tura chhawr a him lohzia a tilang chiang hle a, tun hnuah chuan hemi kawngah hian Department pawhin fimkhur phah nan hmang se a duhawm hle a ni. Chumai bakah hetianga sawrkar department pakhat hna an thawh vanga Civil mi pathum ngawtin nunna an chân hi chhui chian ngei tur chi niin a lang.

Leave a Reply

This site uses Akismet to reduce spam. Learn how your comment data is processed.