NAAC Grade-A accredited College: Government Serchhip College hi kum 1973 a din a ni a, Mizoram College hlun ber te zinga mi a ni. Tun dinhmunah Government Serchhip College hi NAAC Grade A accredited College a ni mek a, Mizoramah hian College pali – Pachhunga University College, Zirtiri Residential Science College, Hrangbana College leh Serchhip College te chauh hi NAAC Grade A accredited college awmchhun an la ni rih a, hei hian Government Serchhip College dinhmun chu a hrilhfiah mai awm e.
Subject zir theih te: Government Serchhip College ah hian Arts, Science leh BCA (Bachelor of Computer Application) te a zir theih a. Arts ah hian subject hrang hrang – Mizo, English, History, Political Science, Geography, Economics leh Education te a zir theih a; Science stream ah hian subject chi hrang hrang – Physics, Mathematics, Chemistry, Zoology leh Botany te hi a zir theih bawk.
Infrastructure and Facilities: Government Serchhip College hian Academic building changtlung tak a nei a, Administrative building pawh SASCI sum hmanga sak mek a ni bawk a, reiloteah peih thuai tum a ni. Zirlai te tan mipa hostel leh hmeichhe hostel changtlung tak a awm a, infiamna hmunhma tha tak – Volleyball Court, Basketball Court, Badminton Hall leh Gym tha tak leh changtlung tak a awm mek bawk. Library tha tak a awm bawk a, tun dinhmunah College Library ah hian lehkhabu singkhat sangnga chuang a awm mek a, heng lehkhabu te hi computerized vek a ni bawk.
Campus zau, nuam leh fianrial bawk si: Government Serchhip College tluka Campus zau, nuam leh fianrial tha bawk si hi Mizoram hmun dangah a awm kher lo mai thei. College Campus hi zirna hmun ni awm rengin a fianrial tha em em a, a hmunhma a zau bawk a, thing chi hrang hrang a ding ngaw khup a, nipui sensa hnuaiah pawh a dai ruih thin. Campus chhungah hian nungcha leh sava chi hrang hrang hmuh tur a tam thin hle a, heng nungcha te hi tha taka humhalh mek a ni. Tun dinhmunah vantlang kawngin College campus hi a paltlang mek a, hei hi tha ti loin thuneitute chuan a helna tur kawng an zawng mek a, work proposal/estimate pawh PWD in an buaipui mek bawk. College helna kawng (diversion road) hi siam puitlin a nih hun chuan College Campus hi tun ai hian a him leh zual ang a, zirna pawhin nasa takin hma a sawn phah ngei ang.
Academic-ah pawh: Government Serchhip College hian University result pawh a nei tha thin hle a, Mizoram College zingah pass percentage sanna ber pawl a ni thin. Kumtin tih theihin Government Serchhip College atang hian University pumpuia lang pha (top ten/rank holder) an chhuak chamchi a, heng subject hrang hrang- Physics, Chemistry, Mathematics, Zoology, Botany, Political Science, Geography, English, BCA etc. ah te hian University rank holder kan lo nei tawh thin a, Government Serchhip College atang hian University topper/rank holder 27 zet an chhuak tawh a ni.
Club/Cell hrang hrang: Government Serchhip College ah hian Club/Cell hrang hrang 20 chuang din a ni a, heng club hrang hrangah te hian zirlai te an in hmang tha thin hle a, club tinah hian teacher in-charge ruat vek anni bawk. Kar tin Zirtawp ni chawhnu period hnih hi heng club hrang hrang te’n activities an neih nana serh hran a ni a, heng club hrang hrang te hi zirlai te hian an chhawr tangkai thin hle a, leadership quality nei tura an inchherhriamna hmun, an personality develop na tura hmanraw tangkai tak a ni. Hei bakah hian NSS activities hrang hrang tha taka kalpui thin a ni a, Serchhip College atang hian NSS Program Officer leh Student Volunteer, State Award dawng pha te pawh an lo awm tawh a ni. NCC Air Wing leh Army Wing a awm bawk a, NCC hi zirlai, a bikin force lam luh tum te tan a tangkai hle a ni.
Government Serchhip College atang hian a zawnin kum thum chhung zet chu Mizoram aiawha Youth Parliament a tel tur te thlan chhuah an lo ni tawh a, Youth Parliament-a tel tur hian Mizoram aiawh turin College hrang hrang te an intihsiak thin a, Serchhip College zirlai te hi titha ber niin tum thum zet Mizoram aiawh tura thlan an lo ni tawh a, kan State aiawhin India Parliament ah thu an sawi pap pap a ni. Hei bakah hian State level quiz competition-ah leh intihsiakna hrang hrangah zirlaite hi an tel thin a, Mizoram-a titha ber nihna, champion trophy pawh vawi duailo an hlawhchhuak tawh a ni.
I thiam, i finna pei pung tur leh, hmakhaw eng zawk i neih theih nan Government Serchhip College ah hian lo lawi lut ve rawh le.