Kan buaina thin te hi – Laldinpuia (20-06-2017)

Tunlai khawvel changkanna hian Mizote hi min va sawp nasa tak em! tih hi ka ngaihtuah fo thin. Kan khawvelin hma a sawn chak si a, he hmasawnna hian duhsakbik nei lovin khawpui leh thingtlanga awm te hi min hrut rual vek mai si a, tunlai kan kalphung ina a ken tel khawl thil te leh a tihdan thar(system) te hi a then tana buai tham nilo mahse tam tak tan chuan buaina tham a tling thin. Digital India-in min tuam a, tunhmaa inhriatthiamna nena hun lo hmang chho thin khan tunah chuan Computer-in duhsak bik nei hauh lovin dik takin ro min relsak ta a, hei hian Mizote min tibuai zo ta a ni ber e.

Tunhmaa titha peih mang lova sawrkar hna kan lo thawh thin te, inthlahdah taka data collection kan lo neih thin te, kan piankum kan lo zep then thin te, document dik lo taka kan lo neih thin te khan nghawng a nei chho mek zel e. Tunhmaa thenkhat tana tangkai em em Birth Certificate pahnih pathum kawl te khan tunah chuan tangkaina a nei ta lo. Tunah zet chuan sawrkar hnathawk zingah tunge dik taka thil ti thin, tunge felfai leh belhchian dawl taka hnathawk tih te pawh hriatchhuah a awl ta hle mai.

Aadhaar Card-ah kan buai a, kum hmasa lamah awlsam taka thla a lak theih laiin kan hlau a talangin thlalak sak tur awm awm manglo khawpin a latute an hahdam a, mahse tunah erawh a thawktute zim buai khawpin thlalak duhin kan intlar lehsi a. Tin tunhmaa veng hrang hranga kala Aadhaar thla lo latu te khan fimkhur takin kan document te kha record in kan data te kha vawngtha se la, aadhaar card la neilo, data siamthat ngai etc. tih vel hi tam tak kan pumpelhin ka ring. Tuna heti em ema data diklo siamthat ngai a tam ta mai hi thla latu hmasa lam te kha data upload lamah leh document chhutluh lamah an lo fimkhur hlel deuh ni a hriatna ka nei ta rum rum mai.

Mizo te hian fimkhur nachang kan hriatloh avangin kan hming te hi kan thlak ngun lutuk a, document hrang hranga hming ziahdan inang awm miahlo pawh kan lo awm teuh mai. Hei hian tunlai khawvelah hian buaina min thlen mek zel zawng anih hi. Mahni identity atana mahni hringtu nu emaw pa emaw hmang lova nupui/pasal te hming kan dah daih thin te hian harsatna min siam mek a ni. Kan Voters ID ah te hian kan pa emaw kan nu te emaw hming i dah ngei thin ang u(kan nupui/pasal te hming dah lovin). Central vela official document ah hian nupui/pasal hmimg nilovin nu/pa hming hi ziah ngei ngei a ngaih thin avangin a document proof na tur a awmloh phah fo thin a ni. Tin tunlai khawvelah engkim deuhthaw hi online system a tih a ngaih tawh avangin kan hming ziahdan ringawt pawh hi kan fimkhur a ngai. Kan hnam hming leh Full stop kan dah dan ringawt avang te hian kan document hi diklo anga ngaih theih a ni tih i hre thar ang u.

Tunah chuan sumdawng tur emaw, sawrkara thil engemaw ti tur tan chuan Aadhaar Card te, Pan Card te hi document pawimawh tak a ni chho mek zel a ni. Hei vang hian a la neilo ten a rang lamin neih tum ila, a nei tawh si correction tih ngai kan nei anih pawhin muang chang lovin a rang lama correction kan vat loh chuan document diklo nei ang kan ni dawn a,sawrkar atanga kan chanvo tur hi kan chanloh phah thei a ni tih i hria ang u. Chuvang chuan document, identity card reng rengah kan chanchin kimchang kan tarlan te a dik thei ang berin tarlang thin ila nakina kan buaina tam tak tur hi kan pumpelh thei dawn a ni.

RELATED ARTICLES
November 11, 2019
November 8, 2019
November 8, 2019
November 6, 2019
November 6, 2019

1 COMMENT

Comments are closed.