DMK-in UPA an thlawpna an hnukdawk

Kum 2004 atanga UPA thawhpui DMK chuan UPA sawrkar an thlawpna an hnukdawk a, An party hruaitu, M Karunanidhi chuan an thutlukna hi nimin khan Chennai a thuthar lakhawmtute hmaah a puang a ni.

Pu Karunanidhi-a chuan Sri Lanka a Tamil te dinhmun hrehawm tak ngaihsak duh lo ah puhin, heti chunga a party-in UPA a thlawp chhunzawm zel chuan Tamil te thinlung an tihnat tur thu leh pawikhawihna lian zawk a thlen a hlauh thu a sawi a ni.

United Nations Human Rights Council-ah Tamil te thlavang hauh lova, mihring dikna leh chanvo rahbeha awm mek chungchang sawihona pawh ral thlir ringawtah UPA sorkar chu a puh a, UPA chet dan chu democracy kalphung palzutna a ti a, DMK minister ten nimin emaw vawiin khian banna an thehluh a rin thu a sawi a, Sri Lanka-a Tamil te suatna an dem thu UPA sorkarin ni 2 chhunga a siam anih erawh chuan an thlawpna chungchang an ngaihtuah that leh tur thu a sawi.

Hetihlai hian DMK chet dan chu lemchan thil mai niin Tamilnadu Chief Minister Jayalalithaa chuan a sawi a, Tamil te pui tura hun tha tak tak an neih tawhah te DMK chuan chet a tum ngai lo niin a sawi.

Hetianga DMK an inhnuhdawh avangin hian UPA sorkar chu a nghing chuang lo niin Finance Minister P. Chidambaram chuan a sawi a, sorkarna siam turin DMK member te tel lo pawhin member an ngah tawk niin a sawi a ni.

Parliamentary Affairs Minister Kamal Nath chuan nimin Lok Sabha thutkhawmah Sri Lankan Tamil te chungchang sawi turin an inpeih tih a sawi a ni.

Nimin zing khan Congress President Sonia Gandhi chuan Sri Lanka-a mihring tihduhdahna thleng chungchang chhui chian a duh thu a sawi a, Sri Lanka-a Tamil te chu an ngaihven reng thu sawiin, Sri Lanka-a Tamil te tawrhna chu pawi a tih thu a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram