Home Minister Pu R.Lalzirliana chuan National Liberation Front of Tripura (NLFT) ten an rukbo mi 5 te chu nimin thleng khan Bangladesh ram chhungah la hren an ni, a ti.
Home Minister hian mi rukbo te chungchang hi nimin khan house a hrilh a, mi rukbo te chhanchhuah hna Sawrkarina chak taka a thawh theih nan a kaihhruaina hnuaiah ‘Crisis Management Group’ din a nih thu a sawi a, He Group hian, din a nih a\anga tun thlengin ngaihtuahna tam tak sengin; rukbote himdam taka chhanchhuah an nih theih nan chak takin hma a la mek ni, a ti. He inrukbona a inhnamhnawihte hi mi 10-15 vel nia hriat an nih thu leh Mizoram khawthlang lam leh Bangladesh inrina lai vela an Area Commander hoa an thiltih nia a lan thu sawiin, Tuikuk NGO hrang hrangte leh Bangladesh-a Sazek tlangdung vela cheng NLFT be pawp thei tura ngaihte pawh tirin, sawrkar chuan hma a la mek, tih a sawi bawk.
Hel ten an mi rukbote an hrenna hmun hi ramdang Bangladesh ram chhung daih a nih avangin sawrkar tan chuan Police Force-te hmanga chhanchhuah tuma hma lak chi a ni lo tih sawiin, Central sawrkara External Affairs Ministry lamah te he thil thleng chungchang hi hriattir a ni tawh a. Bangladesh sawrkar pawh hma la tura ngen turin Ministry of External Affairs-ah thlen a ni tawh a ni, a ti.
Home Minister chuan Tripura State Special Branch-te hnen a\anga an hriat danin Tripura helpawl NLFT te hian nikum lam a\ang khan Mizoram Bru thalai Tripura refugee Camp a awm mek mi 15 atanga mi 20 vel training pe in an enkawl mek a. Pawl hming leh thiltum fumfe tak an neih hriat la nilo mahse NLFT te hian sum tuak nana mi rukbo hna an thawhnaah an hmang \angkai hle tih hriat a ni tih a sawi bawk.
Hel te hian Tuikuk lama an mi hmante zinga mi kaltlangin rukbo te tlanchhuah nan cheng vaibelchhe 1 an phut tih a sawi a, amaherawhchu, sawrkar chuan rukbote tlanchhuah nan hian sum pek a duh lo a, intiamkamna awm lova rawn chhuah thuai turin a duh a, hma a la mek zel tih Home Minister chuan a sawi a ni.
Tarlan tawh angin, thlahlui Ni 19 zing dar 4 – 5 inkar vel Mamit District-a Chikha Khua atangin mi 5 helho in an rubo a, rukbo te hi Forest Department MR 3- Lalliansanga, Sangmawia leh Vanlalfaka bakah JCB Operator 2- Vanlalruatkima @Nelsona (28) leh Lalrammawia (22) te an ni a, Nelsona leh Lalrammawia te hi unau an ni a, Aizawl Hunthar Venga cheng an ni. An rukbo zinga mi Forest Department MR Vanlalfaka hi BLFM hel in pe te zinga mi a ni.