Serchhip March 13, 2013: Serchhip District MPF ten April ni 15 hma-in Serchhip District chhunga Constituency pathum huam chhunga VC Area tinah MPF Local Forum din vek an tum.
Nimin chawhma dar 11:00am khan Mizoram People Forum, Serchhip District te chu Sub-Hqrs. YMA Office, Serchhip Bazarah thukhawmin hmalakdan tur hrang hrang an duang a, kumin April ni 15 ralhma ngeiin Serchhip District chhung Constituency 3 – Serchhip, Hrangturzo leh Tuikum Bial a Village Council Area tinah Local Forum chak tak din vek nise, a din turin Pastor Bial tinah Bial vawngtu Pastor theuh ten mawh lo phur se an ti a, MPF Constituency Forum la din lohna Tuikum Bial ah pawh Constituency Forum din a nih thuai theihnan chak taka hmalak ni bawk se an ti.
Nimina Serchhip District MPF Meeting hian Serchhip District chhung khua leh Kohhran hrang hrangah te Thusawina Hun dila Awarness Campaign neih ni se an ti bawk a, Kumin July thla ralhma ngeia Awarness Campaign a Serchhip District tuamchhuah an tum dawn a ni. Hei bakah hian Serchhip District MPF te hian Serchhip Constituency hrang hranga Pol. Party tin Block hruaitute lengah sawmin titipui an tum bawk a, kumin kumtawp lama Mizoram inthlanpui lo awm turah boruak muanawm tak hnuaia kalpui a nih theihnan theihtawp chhuaha tan lak chhoh tan an tum.
Serchhip District MPF hnuaiah hian February ni 18, 2013 khan Serchhip Constituency MPF Forum din niin New Serchhip Bialtu Pastor Lalhmachhuana President a ni a, hemi rual vel hian Hrangturzo Constituency MPF Forum pawh din a niin President ah Khawlailung Pastor Lalsanglura President a ni. MPF Constituency Forum la din lohna Tuikum Bial ah pawh Convener atan Chhingchhip Pastor Vanroluaha chu MPF Gen. Hqrs. ten an ruat tawh a, reilote ah din fel thuai beisei a ni.
Nimina Serchhip District MPF Meeting hi an President Rev. H.Lallianzara’n kaihruaiin VC Area tina MPF Local Forum din zawh hnu May thla chawhma lamah MPF General Headquarters te nen inthuruala puitham taka Seminar buatsaih an rel bawk.