Mizoram News

Consumer te tana harsatna siam lo zawnga thil ti turin ngên

Mizoram Consumer Union chuan eirawng bawlna Gas chungchanga Central sorkarin Policy thar a kalpui vang leh IOC in customer hre chiang tura Gas Agent-te a tih avangin Consumer-te harsatna siam lo zawnga thil ti turin Gas agent-te a ngen.

He mi chungchanga tunlaia harsatna ṭhenkhat Consumer ten an tawh chungchang leh thil awm dan sawi fiahin MCU President, Pu Thanglura chuan Central sawrkar dan siam angin chhungkaw pakhat, chaw chhumna hmun pakhat nei tan subsidy-a gas connection pakhat chauh neih phal a ni a, gas connection pakhat aia tam nei te chuan subsidy-a lâkna bak zawng chu non-subsidy gas lak nan an gas card chu an hmang thei a, hming thlak a ngai chuang lo va, amaherawhchu, non-subsidies gas lak nan an hmang dawn tiin a category erawh chu an thlak a ngai a, heta tan hian sum chawi belh a ngai lo a ni a ti.

Gas Agent khat hnuaia, hming inang an nih vanga buaina awm chungchang sawifiahin MCU President chuan hei hi awlsam taka chinfel theih a ni a ti a, chutiang an awm chuan an pa hming a danglam ang a, an chhungkaw hming a danglam bawk ang a, Photo Identity Card leh Ration Card te pawh a danglam vek a, hemi vanga harsatna awm chu awlsam takin gas agent ten an chinfel sak tur niin a sawi.

Gas card-a hming chuang chhungkaw pa ber emaw, nu ber emaw a thihin gas card hman chhunzawm nan roluahtu nihna, Heirship Certificage lak kher a ngai lo va, Death Certificate leh Affidavit a tawka, IOC in he tiang thila hman tur Form a siam hmangin awlsam takin thil a tihfel theih a, gas agent hnenah sum pek ngai a awm lo va, Affidivit siam tir nan erawh chuan pawisa chawi hlek a ngai a ni a ti.

He ta tan hian a dilna form chu IOC website aṭangte leh agent te aṭangin awlsam taka hmuh theih niin a sawi bawk.

Gas Consumer Card a hming chuang thlak chungchangah chuan connection thar lak anga thil tih a ngai a, a form dik tak hmangin Photo Identity Card, passport size thlalak leh Ration Card-te hman theih a ni a, tun hmalama Security Deposit pek kha rin nghal theih a ni a, amaherawhchu, tun hma khan Security Deposit cheng 500 emaw, cheng 900 emaw a nih avangin, tuna Security Deposit Rs 1,150 a nih tawh avangin tun hmalama Security Deposit pek in a diahlohna zawng chu pek belh a ngai niin a sawi bawk.

Mizoram Consumer Union President chuan, IOC thu anga tun laia Agent hrang hrangten Know Your Customer (KYC) an tih mek chungchangah te gas connection siam danglam chungchangah te harsatna nei chuan MCU hruaitute thil awmdan an zawtfiah thei reng niin a sawi bawk.

Central sorkar ruahman anga ei rawngbawlna gas man tlawma chhungkaw khat tan kum khat cylinder 9 chauh pek theih tih chu tun thla atanga hman tan a nih tawh avangin Food, Civil Supplies & Consumer Affairs Deptt. hnuaia LPG Sub Committee chuan tun hnai khan Gas semna rate a ennawna, Subsidised gas tuallaia semna rate chu tuna a man pangngai bur 1 zelah cheng 432 ni zel se tih a nia, Distributor-te Showroom aṭanga pekna rate chu cheng 408 ni a ni bawka, subsidy tel lo va a man tova Aizawl khawpui chhung hmun hrang hranga gas semna rate chu bur khat zelah cheng 1072-ah bithliah a ni a, Showroom aṭanga lakna tur rate chu bur khat zelah cheng 1048 a ni bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram