Zothlifim Logo
Loading ...
Mizoram NewsMizoram News

Mizoram University Students Discussion Forum chuan Mizoram Political Party leh an Policy chungchanga mipui ngaihdan an lâkkhawmah zawhna chhângtu zinga za zela 41 te chuan NLUP in thingtlang hmun tam takah Congress Party chu vote a pek an rin avangin inthlan leh hunah sawrkarna an siam leh an ring tih an sawi a, hetihlai hian Chief Minister atan ZANP President, Pu Lalduhoma duhtu an tam ber thung a ni.

MZUSDF hian Inrinni khan Aizawl Press Club-ah thuthar lakhawmtute kâwmin mipui ngaihdan lakhawma an thil zir dan hi an puang a. An zirchianna aṭanga a landanin Chief Minister lo ni tawh zingah Brig.T.Sailo chu Chief Minister ṭha berah zawhna chhangtute’n an ngai a, zawhna chhangtu tam ber, za zela 37 te chuan Zoram hmasawnna tur tak tak kalpui duh mi niin an ngai a ni. A pahnihna ah Pu Zoramthanga awmin, zawhna chhângtu zaa 21 te chuan hmasawnna chak taka kalpui thei nia an hriat avangin ṭha an ti a. Pu Lal Thanhawla chu mi huaisen leh Leadership nei ṭha tak nia ngai za ah 19 awmin pathumna ah an dah thung a. Pu Ch.Chhunga chu dikna ngaina tak mi nia ngai zawhna chhangtu zinga za a 4 te chuan Chief Minister ṭha berah an ngai bawk a zawhna chhangtu zinga za a 2 te chuan Pu Laldenga chu mihuaisen tak leh dikna ngaina tak mi nia ngai an awm a, Chief Minister ṭha Mizoramin a la nei ngailo hrim hrim ni a ngai zawhna chhangtu zingah za ah 17 an awm bawk a ni.

Heng ngaihdan lakhawm zingah hian zawhna chhangtu za zela 39 te chuan tuna Political Party President te zingah Chief Minister atana an duh ber chu Pu Lalduhawma a ni a, a policy hlawhtlinna tur atana enchhin chak an tam ber a ni. Hmasawnna chak taka kalpui ṭhin leh miretheite chhawr phak sawrkar a siam ṭhin nia an ngaih vangin zawhna chhangtu za a 24 te chuan Chief Minister atan Pu Zoramthanga chu an duh a. Pu Lal Thanhawla chu Mihuaisen leh mahni thusawia ding nghet tlat mi ni a an ngaih avangin Chief Minister atana duhtu zawhna chhangtu zingah za ah 14 an awm a. Chief Minister atana MPC president Pu Lalhmangaiha Sailo duh tu za ah 3 an awm bawk a,zawhna chhangtu te zinga za a 20 te chuan tuna kan Political Party President zingah Chief Minister a tana duh an nei lo thung a ni.

MZUSDF te hian Mizoram District pariat atangin politics-a ṭan lam bik neilo a an ngaih thlan bik mi 480 aṭangin an la a, zawhna te hi Gazzetted Officer, ṭhalai lehkhathiam hna nei lo te, kuthnathawktute leh Mizo zinga mi challang te aṭangin ngaihdan hi an lak thu an sawi

Chhanna lut aṭanga an khaikhawm leh zirchianna aṭanga a lan dan tlangpui-ah chuan Mizoram mipuite hian tuna Political Party-ah hian rinna tak tak an nghat ngam tawk lo deuh niin a lang tih an sawi a, Sawrkar tura an duh leh rin ber te paw’n Sawrkarna chang pawh ni se hma la tha hle tura an beiseina a tlem hle tih an sawi a bawk a ni.

Nimina Mizoram University Students Discussion Forum te’n thuthar lakhawmtute an kawmna hun hi an Vice Chairman Hmingsangzuala leh Joint Secretary R.Lalduhawma te chuan an kaihruai a ni