Mizoram Fire and Emergency Services a thawkte chuan nimin zing dar 7 khan Fire Service Hapta pualin Martyr’s Day an hmang.
He hun hmanna pui ber hi Aizawl Hunthar Venga an hmunpui-ah a ni a, hemi rual hi Mizoram hmun hrang hranga Fire and Emergency Service hmun leh Fire Station-ah te he ni hi hman a ni a. Nimin zing khan India ram hmun hrang hranga nikum April ni 1 leh kumin March ni 30 inkar chhunga an hnathawhnaa kangthelh pawl mi thi mi 5-te sunna hun hman a ni a. Heng an sun takte hi Odhisa kangṭhelh pawl mi 3, leh Andhra Pradesh leh Tripura kangṭhelh pawl mi pakhat ve ve te an ni.
Fire and Emergency Services Director Pu C. Laldina chuan midangte tana inpekna rilru nena thawk chhunzawm zel turin kangṭhelh pawla thawkte chu a fuih a ni.
Kum 1944 April ni 14-a Bombay lawng chawlh hmun a kan vak ṭum khan Bombay Kangṭhelh Pawl mi 66 leh Bombay Slavage Corps mi 11 laiin nunna an chan a. He an inpekna hlu tak hriatrengna atan hian sawrkar laipui chuan April ni 14 hi Fire Service Day-ah a puang a, Fire and Emergency Services hnathawkte chuan ram pum huapin Martyr’s Day atan an hmang zui ta bawk a ni.
Nimin aṭanga ṭan tak Fire Service Week chhung hian tihtur tam tak ruahman a ni a, Nimin tlai dar 3 leh dar 6 inkar khan Aizawl khawpui chhung veng hrang hrangte chu Kangṭhelh motor hmangin an fang kual a, kangmei laka fimkhur pawimawhzia an puang a. He hapta chhung hian mipui punkhawm tamna hmun – Millennium Centre, New Secretariat building, Solomon’s Cave, Civil Hospital Aizawl, New Market, Lalbuaia Shopping Complex leh kangmei chhuah hlauhawmna Mualkhang Bottling Plant hmun te chu a him tawk em tih enfiah a ni bawk dawn a ni.