Lawngtlai Khawpui chhung kawng chhe lutuk Siam that phutin Lawngtlai Auto Rickshaw Owners & Drivers Association chuan Ni hnih chhung awh nawrh nimin aṭang khan an huaihawt a, nimin leh vawiinah an eizawnna chawlhsanin Service loh nise an ti a ni.
Auto Rickshaw Service loh avang hian nimin khan Lawngtlai ah khawsak phung a khaihlak hle a. Lawngtlaiah hian Auto Rickshaw Service lai hi Nitin 120 vel an awm a, eizawnna bera hmang chhungkaw engemawzat an awm a ni. Lawngtlai Khawpui chhunga kawng siam hna hi Kum Li kalta khan company 1, Bengal Prakalpa Nirman Pvt.Ltd ten thawk turin an inruahman a, Bungrua engemawzat chhawp anih tawh hnuah nikum khan Pawisa lama harsatna awm chhuanlamin an thawk leh thei dawn lo niin an insawi a, hei vang hian kawng hi kum engemawzat siam lohin a awm tawh a ni.
PWD chuan he kawng siam tur hian Tender chhuah thar anih leh tawh thu leh hna thawktu thlan thuai anih tur thu te, hna tan anih thuai tur thute sawi thin mahse, nimin thlengin Kut thlak ala ni lo tih sawiin, Auto Rickshaw pawhin a chhiat pui nasat thu an sawi a ni.
Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117