Cheng nuai 500 senga Serchhip-III Bawngchawm Lunglei rama kuthnathawktute tana hma lak mekah nimin khan hmanrua leh tangkafai sem chhuah a ni.
Bawngchawm Lunglei ramah hian nikum August thla aṭang khan kuthnathawktu chhungkua ten kumtina lo neih kalsana huan nghet an neih theih nan Centre of Exellence project kalpui mek a ni a, helai hmuna huan neitute hnenah hian thlam sakna atan `20,000/- ṭheuha pek an nih tawh bakah nimin khan Terrace laihna turin `4,500/- ṭheuh pek chhuah leh an ni a, hetih rual hian Sapthei zâmna tur thirban 46 ṭheuh leh tui lâkna tur pipe tel khat ṭheuh pek an ni bawk.
Helai hmuna huan nei kuthnathawktute hi he project aṭanga hian thlai thar rang tur chi fur Zikhlum leh Sapthei chintir tum an ni a, nakina a rah seng theih turin Serthlum kung 200 ṭheuh ching tura tih an nih bakah an thlai châwm nan anmahni huan ṭheuhah tuikhuah siamtir an ni ang a, thlai châwmna lei ṭha chi hrang hrang Qtls. 20 ṭheuh pek leh tura ruahman niin, ṭha taka hma la te hnenah kum 2 chhungin `15,000/- an dawng thei dawn bawk a ni. Helai hmuna beneficiary chhungkaw pakhat ṭheuhin hmanrua leh tangka fai an dawn tur zawng zawng belhkhawm hi `3,75,000/- vel a ni dawn a ni.
Tanpuina sem chhuah inkhawm Centre of Exelence Lecture hall, Serchhip-III Lunglei rama neih hi Serchhip-III VCP Pu Lalramliana Sailo chuan khuallian niin a hmanpui a, inkhawm hi District Horticulture Officer Pu C.Lalhmangaiha’n a kaihruai a, Pi Lucy Zaithangpuii HDO in hmalak dan tur kuthnathawkte a zirtir a. Khuallian chuan heti tak malsawmna hi remna boruak rah chhuah a ni tiin, keini nih hi a nuam a, taihmakna leh rinawmna nen phur taka bawhzui zel ang u tiin a fuih a ni.
Horticulture Department hian helai hmunah hian Hall leh quarter ṭha tak tak sa in Green house lian tawk tak 8 an sa tawh a, nimina hun hmannaah hian beneficiary 60 aṭangin 57 an an kal a, tualchhung chanchinbumi an kal ṭha hle bawk a ni.