Khawzawl-a Sub District Hospital Building sak mek chu sak chhunzawm zel anih chuan Hospital Mangkhawng ni mai tur niin MNF Thalai chuan an sawi.
MNF Thalai chuan Sub-District Khawzawl Hospital sak mek chu sawiselna nasa tak a awm avangin a hmunah endikin an kal tih sawiin he Hospital Building sak mek hi a beam zawng zawng a kul vek a, a ban leh a beam inzawmna laiah nasa takin a khi vek bawk. A hnuai atangin ban siam chawpa a beam kul leh kawi chu do a ni a, a dona hian a beam a thlen phak lohna chu Cement chawhsa in an hnawh leh tawp a, he an hnawh zawmah hian a chungah sak zawmin, thil rit han dawl zo tur a nih loh avangin a rinawm lova, hei vang hian he Building hi sak zawm chi an ngaihloh thu MNYF te chuan sawiin Bialtu MLA, Minister Lalrinliana Sailo chu a rang thei ang berin PWD Quality Control Division Engineer te ngei tirin an hmanrua Re-Bound Hammer hmangin endik tir vat se chutianga an endik hnu a Engineer ten chhunzawm tlaka an ngai a nih chauhin sak zawm ni chauh se an duh thu an sawi a. Health Minister bial lehnghala hetiang taka chhia Hospital Building sak a ni hi mak an tih thu an sawi a ni.
March ni 25 khan Chief Vigilance Officer hnenah he Building sak mek chhe lutuk hi enfiah a, Engineer ten sak chhunzawm tlak an tih loh chuan chhunzawm tir lova endik hma chu hnathawh titawp rih tur leh arang thei ang bera endik tir turin ngenna an siam tawh a, vawiin thleng hian endik lovin he hna hi thawh chhunzawm mek zel nia sawiin hetiang taka Contractor ten hlep tam an tum vanga chhe taka hna an thawk ngam leh, an huaisar em em mai hi, he hnaah hian bialtu MLA leh Minister Lalrinliana Sailo hian ‘Share’ a nei em ni tih hi kan zawhna a ni, MNYF chuan an ti bawk.