Mizoram sawrkara Disaster Management & Rehabilitation Department leh GeoHazards Society tangkawpin lirnghing leh leiminin Aizawl khawpui a nghawng dan tur leh hemi laka inven dan tur leh chhiatrupna thlen thulha chet lak dan tur chungchanga meeting New Secretariat Complex-ah neih a ni a, he meeting hi ni 3 awh tur niin a ṭanni nimin khan Finance Minister Pu H.Liansailova leh DM&R Minister of State Pu Nihar Kanti Chakma te an tel a ni.
Panel Meeting DM&R Principal Secretary Pu P.C.Lallawmsanga kaihhruaiah Pu H.Liansailova chuan Mizoram chu lirnghing na tak thlen theihna hmun Seismic Zone V-ah awm a nih avangin mithiam zawkten Mizoram leilung chungchang leh hetiang chhiatrupna thlen palh pawha a dinhmun tur chiang taka an sawi a zirtirna an pek chu a pawimawh hle a ni, a ti a. Mizoramin helama finchhuah leh tanpui a mamawhzia hriain GeoHazards International ten a thlawna a hmuna lo kal a, zirna leh training an rawn buatsaih bakah chhiatrupna lo thlen palh pawha a hmachhawn dan tur Project duansak an tum avangin lawmthu a hrilh bawk a ni.
DM&R Minister Pu Nihar Kanti Chakma chuan sawrkarin chhiatrupna thleng tur laka inven dan kawngah theih ang anga hma a lak mek thu a sawi a. Aizawl khawpui than dan leh in sak dan en chuan vawiin thlenga him taka an la awm chu Pathian zahngaihna vang liau liau a ni a ti.
GeoHazards International Sr. Adviser Pu L. Thomas Tobin chuan an pawl chanchin sawiin khawvel hmun hrang hranga lirnghing emaw leimin emaw chhiatrupna dang a thlen pawhin an pawl chuan theihtawpa hma an lak thin thu a sawi a. Mizorama an rawn kal chhan chu a ram leilung leh a bik taka Aizawl khawpui zirchiang tura lo kal an nih thu a sawi a, khawvel hmun danga an thil hmuh leh tawn tawh atangin thurawn an pek theih ngei an rin thu a sawi bawk. GeoHazards chuan leilung awmdan atangin Mizoram hi lirnghing eng ang a nain nge a sawi thei ang tih te, chutiang thleng palhah pawh engtia in ven lawk theih nge a nih tih te leh lirnghing awm theih dan tur a lema awm tir chhina, Aizawl chu eng ang takin nge a khawih chhiat theih ang tih an zir tur thu a sawi bawk a ni.
Nimina ṭan tak Panel Meeting-ah hian DM&R hotute bakah a kaihhnawih department hrang hrang aiawhte an tel a. Expert Team-ah ramchhung leh pawna mithiam thahnem tak an lo tel bawk a ni.