Mamit Char kawn venga Mizoram Rural Bank chu misual tu tih hriat loh ten tun Thawhṭanni zan khan an rawk a, pawisafai `10,000/- chuang an la a, misual te hi Mamit Police ten an zawng mek a ni.
Mizoram Rural Bank rawk a nih thu hi nimin zing dar 6 vel khan hriat a ni a, Bank building chhâwng chunga awm Pu Tlangthangliana zing tho-in Bank kawngka inkalh loa awm a hmuh chu a ṭhenawmpa, Bank manager ni bawk chu hrilhin bank rawk a ni tih hriat chhuah a ni.
Bank rawktu te hian Bank kawngkapui Talaa inkalhna lai chu kar chhia-in Bank chhungah an lut a, Bank chhunga Almirah leh pawhdawh awm zawng zawng chu an hawng vek a, mahse pawisa dahṭhatna Safe chu hawng thei lo a, Bank manager dawhkan a pawhdawh chhunga a mimal pawisa `10,000/- vel leh Bible Society of India bawm huna pawisa te chu an la a ni.
Bank manager Pu Benjamin Lianzama sawi danin misual bank rawktu te hian pawisa fai bak, lehkha pawimawh leh thil dang te chu lâk an nei lo a ti a ni.
Mamit-a Mizoram Rural Bank-ah hian Bank vengtu an awmlo a, Bank chhunga CCTV te chu current a awm mumal loh avangin a hman hleih theih loh bawk a, Bank rawk a nih lai pawh hian CCTV chu nung lo-in engmah a record lo a ni.