Mizoram News

US Vice Consul-in Aizawl tlawh

India rama US Palai, Vice Consul Akash R.Suri an ni 3 châm turin Aizawl a rawn tlawh a, US leh India ramin inkungkaihna ṭha zawk a neih theih nan hmun kilkhawr zawka cheng te thlenga inhriat pawhna siam chu Mizoram a tlawh chhan ber a ni tih a sawi.

Zawhna chhangin, US Vice Consul Akash R.Suri chuan ram pahnih inkara inkungkaihna tha a awm theih nan Mizoram mipui a bikin zirlai te tan US chu a inhawn thu leh US mi tam zawk te pawhin Mizoram chu tlawh se a duh thu a sawi a, tunah hian Mizo mipui US tlawh duh te Visa kalhmang kawhhmuh an tum thu leh US chungchanga thil dang an hriat duh hrilh tura India hmarchhak bialtu Kolkotta-a US Consulate a inhawn reng thu puanzar an tum thu a sawi a ni.

US Vice Consul hian nimin khan Aizawl Club-ah Mizoram Chamber of Industries and Commerce bultumin MCIC member te leh College hrang hranga zirlai te tan US kal theih-na atana ṭul Bussiness Visa leh Tourist Visa awlsam zawka hmuh theih dan tur inzirtirna an pe a, nimin tlai vek khan Aizawla Travel Agent te tan USA a zin te tana an ṭanpui theih dan tur thil pawimawh zirtirin vawiin hian St. Paul’s Higher Secondary School leh Mizoram University ah Student Visa chungchang an zirtir leh ang a, sawrkar hotu pawimawh engemaw zat an kawm hnuah naktukah Aizawl an chhuahsan dawn a ni.