Pawl sum tichingpena puh vanga MHIP General Secretary atanga chawlhtir Lalbiakengi chu MHIP Gen.Hqrs. Executive chuan kum 10 chhung atan MHIP aṭanga hnawhchhuah a rel a. Hei hi an pawl dan kalh a nih avangin Asst. Secretary, Janet Lalremtluangi chuan a hming a sign theih loh avangin a bang tih a sawi hnu-ah April ni 11-a Executive Committee Meeting neih lai a chhuahsan.
Thudawn danin, Lalbiakengi hi kum 2011 khan pawl sum tichingpenah puh a ni a, Police-ah FIR thehluh a ni. He thilah hian Biakengi chuan a eiru lo nia sawiin Court-ah a zualko a. Rorelna Court-a zualko chu pawl dan kalh a nih avangin MHIP Gen.Hqrs. chuan General Secretary atangin a lo chawlhtir tawh nia hriat a ni.
MHIP hian April ni 26 khian hruaitu thar an thlang dawn a, hetah hian Lalbiakengi hian chuh a tum nia sawi a nih avangin tuna President tanglai B Sangkhumi chuan MHIP atanga hnawhchhuah hi OB Meeting-a a rawt tlang zawh loh hnu-ah Executive Meeting-ah AOB atangin a rawt leh a, pawm a ni a, mahse, MHIP atanga ban tur chuan pawl dan angin Biakengi hi a awmna Branch chet hmasak a ngai niin hriat a ni.
Gen. Hqrs. in Biakengi hnawhchhuah a tum dan chu dan kalh a ni tiin Asst. Secretary hian banna lehkhaah hian dan kalha thiltihah a hming a sign theih loh thu a sawi a, pawl duh ang a zawm theih loh avangin a ban thu hi a sawi ta mai nia thu dawn a ni.
Lalbiakengi hian Inrinni thleng khan MHIP atanga hnawhchhuah a nihna lehkha hi a la hmu lo niin thudawnna chuan a sawi.