North Vanlaiphai Govt. High School-a zirlai Esther Lalchhanhimi (17) d/o James Lalrintluanga, North Vanlaiphai Damdawi Veng chuan MBSE-in kumin (2013) HSLC Examination April ni 20, 2013-a a tihchhuahah Science zirtirtu nei lo chungin he subject-ah hian mark 100 ah 80 hmu a, First Division-ah passed in, ‘letter’ a hmu.
Thudawn danin, kum 2012-2013 Academic Session kalta-ah khan North Vanlaiphai Govt.High School hian Science zirtirtu a nei lo a, zirlai hruaitute hmalakna avangin kumin Academic Session atang chuan Science subject-ah hian zirtirtu nghet sorkarin a dah tawh a ni.
Esther Lalchhanhimi chuan, kum 2012 Academic Session-ah Science subject zirtirtu an neih loh avang hian a khat tawkin zirtirtu dangten school-ah an enpui mai thin tih a sawi a. “In lamah text book leh note hmuh theih ang ang indap chawpin theihtawp chhuahin ka zir a, mark 80 vel hi chu hmuh ka inbeisei ve hrim hrim a ni,” a ti. HSLC Exam 2013 ah hian Science subject-a mark hmu sang berin mark 99 an hmu a, mark 99 hmu hi mi 4 awmin, Esther Lalchhanhimi hian heng mi 4 te a phak lohna chu mark 19 a ni.