India News

Nula Thingphur tur 2 thah an ni

Kumber Tea Estate (Cachar District, Assam) chhunga hnathawktu
chhungkaw zinga mi, nula pahnihte chu April ni 13, 2013 chawhma dar
11:30 vel khan hriamhrei hmanga thah an ni.

Nula Pompa Tanti (25) D/o. Jagdish Tanti(L) leh Nula Saphira Patra
(18) d/o. Santo Patra te chu zing dar 10 velah thingpui huam sir
ramhnuaiah thingtuah tur fawmin an kal a, hemi ni vek hian an awmna
venga mipa pakhat chu thing fawm tur bawk hian an kal ve a, dar 11:30
vela ramhnuai a va thlen chuan heng nula pahnih hriamhrei hmanga
rapthlak taka thahte ruang hi a va hmu ta a, khuaah tlan hawngin
chanchin hi ava hrilh ta a ni.

Kumbirgram Airport Security hote leh Cachar District Police SP te pawh
a hmunah kalin thil awmsan an enfiah a, an ruang hi Gungoor Medical
College Hospital ah endik anih hnuin vuiliam an ni. Heng nula pahnihte
hi pawngsuala nasa taka beih an ni a, amaherawhchu an thianghlimna
humhim tura theihtawp chhuahin tan an khawh niin a lang a, a
pawngsualtute hian hriamhrei nena beiin an kutzungtangte an sat chhum
a, an nghawngah an zai a, an nunna an chhat hial a, an rinawmna nasa
tak avang hian an thianghlimna pawh an thih thleng hian an humhim niin
report dawn a ni.

Pompa leh Saphira te hi Salvation Army chhungkua a seilian, Kristian
rinna tha taka vawng an ni a, Salvation Army Youth (SAY) active member
an ni a. Biak Ina zai hruaitu berte zinga mi an ni nghe nghe a. He
chhiat tawhna avang hian Territorial Headquarters Aizawl atangin
officer pali te chu Major Lalmuansanga Emergency Secretary kaihruaiin
nimin khan a hmunah kalin an tlawh a ni.