Zoram Nationalist Party(ZNP) President Pu Lalduhawma chuan a thusawi hre dik ziktluak lo an awm avanga insawifiah a ngaih thu nimin khan Aizawl Press Club-a thuthar thehdarhtute a hrilh a, an party an sawrkar a nih chuan a hmaa eirute ngaihdam tur thu leh an sawrkar hnua rorelna dik tundin a nih tur thu a sawi chu mi ṭhenkhatin hre diklo in, an sawrkar hnu pawha eiru ngaihdam zel tum anga puh a ni chu pawi a tih thu a sawi.
Hemi chungchangah hian mimal taka beihna a tawh thin thu sawiin Pu Lalduhoma chuan, hei bakah hian AMC Councillor zinga mi ten Car man to tak lei ang leh Contract sum tam tham tak hmu a, hralh ṭhin niin an sawi tih a sawi a, hei pawh hi thu diklo a ni tih sawiin, Ruling Party President te, Planning Board Vice Chairman te, MP leh MLA te ni ve tawh ṭhin mahse Contract a la thawh ngai loh thu leh a dil ngai loh thu a sawi a, dâwta intihhmingchhiatna chu ngawihbo pui mai chi nia a hriat loh thu a sawi a, amah puhna ah hian a fiahna tur thil ṭul ang ang te a lakhawm mek a, a ṭul a tih chuan intihhmingchhiat tumna thubuai Defamation Case a file lo vang tih a sawi thei lo tih a sawi a ni.
Phuba lâkna leh inchhui tawn vak vakna chuan politics boruak a tichhia a, hmanraw eng pawh hman duhna a hring a ni a ti a ni.
Pu Lalduhawma chuan Mizoramah pawh Lokayukta leh Special Court neih ve ngei chu ZNP tum dan a nih thu leh hemi ti thei tur an inzirchian mek thu a sawi.
Thuthar lakhawmtute zawhna chhangin, Pu Lalduhawma chuan, inthlanpui lo awm turah Senior mi ṭha tak tak awm mahse an party chuan ṭhangthar la hminghliau lo, a taka che ngam tur a tam thei ang ber Candidate neih an duh tih a sawi a, kawlphetha siam kawngah sawrkar tawh ten kum 40 chhung mamawh khawp an siam chhuak lova, ramri hnaih a state dang chanpual siam tela, a siamtu te tel then tir bawk ai chuan mahni chanpual tam thei ang ber chang tura hmun laili a siam an tum thu a sawi a ni.
An party national Council thudah tawh anga an party chu inthlanpui a a maldin ngei tur thu leh hei hi National Council vek lo chuan a thiah theih loh thu a sawi bawk.