Zothlifim Logo
Loading ...

AH & Vety Department thawktute chuan tunlaia vawk pul hri leng vang
hian vawk 500 chuang an thi tawh niin an hria.

AH&Vety department chhinchhiah danin vawk pul hri leng vang hian
Aizawl district ah ringawt pawh a thi report 465 a awm a, vawk damlo
11,163 a awm bawk a, NLUP hnuaia vawk vulh thlangtu te vawk no pawh
200 chuang a thi tawh nia tarlan a ni.

AH&Vety department thawktute sawi danin tunlaia vawk pul hri leng
‘classical swine fever’ chu a la reh chiah lo nain a ziaawm thawkhat
tawh a, case tharlam dawn an nei tawh rihlo tih an sawi bawk. Vawk pul
hri leng ang chi virus hian min chamchilh reng tih sawiin dan pangaia
an awm chuan harsatna a siam lo a, mahse khawlum tan tirh leh khawro
lai February leh March bakah kum tawp lam ruahtui tlak tawhloh hnu,
khawlum deuh lai si October thla velah hian virus te hi an inthlahpung
chak bik a, chu chuan vawk tan harsatna a siam hma ta bik a ni, an ti
a. A tlangpuiah chuan ruahtui tlak hnuah a ziawm ve leh mai thin tih
an sawi bawk.

AH&Vety Department thawktute chuan ‘tunlaia vawk natna classical swine
fever leng bakah hian kan thenawm Burma ah vawk natna dang PRRS
(Parcine Respiratory & Reproductive Syndrome) a leng mek a, he natna
vei te chu a awm a nat bakah vawkpui in no an chhiat thin a. He natna
hi tunhnaia Mizorama vawk thi thenkhat natna nen a inan em avangin
PRRS a ni thei mai em tih kan ringhlel deuh a, a nih leh nihloh kan
test mek a, Selesih a Vety College ah kan test hnuah a tihchian nan
Bhopal-ah kan thawn leh dawn a ni,’ an ti bawk.

Hetihlai hian, vawk thi te phumbo lova, mipui tana hnawksak thei ang
zawnga paih mai mai an awm ni a sawi a ni a. Champhai-ah chuan Vawk
pulhri leng vanga thi ni ngei a ngaih Vawk ruang chu leilet zawl
Tuipui, Tlangsam kai Tuipui-ah paih a ni a, he tuipui luang kal zel hi
Champhai mipui tuitlan (Greater Champhai Water Supply) anih vangin
Sub-Hqrs. YMA Champhai chuan Champhai DC leh PHE Deptt. hotute a
hriattir bakah Champhai Police Station-ah FIR an thehlut a ni.

Vawk pulhri vanga thi ni ngei a hriat, Vawk ruang hi Champhai
Ruantlang dai-ah paih thin a ni a, heng vawk thi ruangte hi Mulukawlh
rualin tlanin, chawlhkar hnih chuang an chamchilh tawh a, hetiang
titute hi sorkar dan bawhchhia an nih vangin dapchhuah ni ngei se an
duh thu Sub-Hqrs. YMA Champhai chuan an sawi bawk a ni.

Inrinni kha ‘World Veterinary Day’ a ni a, AH & Vety Deptt. leh
Mizoram State Veterinary Council buatsaihin district tinah hri leng
laka ran venna turin a thlawna hridanna pek beihpui thlak a ni.

Vawk pul hri hian, Aizawl, Lunglei leh Champhai district te a tuam mek
a, hemi avanga vawk thi zat hi hriat theih a ni rih lo. Local Council
te nen tanghovin, vawk pul sa mipui ei tura ser anih loh nan AH & Vety
Dept chuan theihtawp a chhuah mek niin an sawi.