Tunhnai khan Hailakandi district chhung Hachhek tlangdunga Mizo awmte
chu Tuikuk hel nia insawiten pawisa an phut a, Mizote rilru nuam lo
takin an awm mek nia hriat a ni.
Bairabi Group YMA President sawi danin, April thla chawhma lam atang
khan Bru National Liberation Front (Joinarama Pawl) intite chuan
lehkhain Hailakandi District chhunga Mizo khua Cachar Zion, B
Tlangnuam, Hachhek, Teltlang, Kahrawt, Tlangpui khua a chhungkaw tinte
chu lehkha pein chhungkaw pakhatah Rs.1,000/- zel an phut a, an pek
loh chuan a hmunah kal chilhin an kuhva kungte an chhiar dawn niin an
sawi. Lehkhaa pawisa an dil bakah hian an khaw hotu Village Headman-te
chu phone hmanga biain, a pe leh pe lote lo chhinchhiah turin an ti
niin thu lakna chuan a tarlang.
BNLF (Joinarama Pawl) intite hian hun bi tuk an nei hran lo a, mahse,
Mizo chhungkua te zingah Rs.1,000/- pek chhuah harsat tak tak an awm
a, hrehawm an ti hle.
Bairabi Group YMA President chuan Hachhek tlangdunga Mizo awmte
thlavang hauh tura kal an tum thu a sawi. Pawisa phut tute hian he thu
buatsaih lai thleng hi chuan sum hi an la lakhawm lo a, Bairabi Group
YMA hruaitute pawhin he thil hi an ngaimawh hle a, boruak awm dan an
thlithlai reng niin an sawi.
Hemi chung changah hian Sub-Hqrs YMA, Kolasib chuan Zirtawpni khan
thuchhuah siamin, hetianga invauna leh sum inchhuhluih tumna hi thleng
tawh ngai lo se an duh thu leh, an thlavang hauh a kal zel an tum thu
an tarlang bawk.