Mizoram News

Zalenna sualtute inpekna theihnghilh chi a ni lo:CM

Chief Minister Pu Lal Thanhawla’n Mizoramin beisei neiin zalenna a sual a, a hlawhtling emaw hlawhtlinglo emaw thalai ten an thisen dahkhama, an nunna an hlan avanga an inpekna chu a hluin theihnghilh chi an nilo a ti.

He thu nimina Mizoram Martyr Family Association (MMFA) General Assembly Vawi 2-na Aizawl Vanapa Halla a hmanpuina ah a sawi a, mahni nun hlantu martyr ten an thil tih hlutna ah an chiang a, a zahawm hle a ni a ti.

Chief Minister chuan Mizoram buaina kha politics a buaina a ni a, silaia chinfel theih a nilova politics veka chinfel chi a nih avangin, kum 1984 a thlan tlin an nih khan India sawrkar leh MNF inkara inremna a awm theih dawn phawt chuan tiin lal thutthleng an ken phal thu an sawi tih a sawi a, kum 1986-a Remna leh Muanna Mizoramin a neih khan kuthnathawktu loneimi leh eizawnna a rahbi tleute tan eizawnna ngelnghet an neih theihna turin NLUP kalpuiin tam takin an hlawhtlinpui a, tunah hian NLUP changtlung zawk kalpui mek ani ta a ni a ti a, thalaite tan khawvel thar infiamna lamah leh zirna lamah chak taka kalpui a ni a ti bawk.

Mizote tichhetu corruption pawh a zung nen lam phawia, phoro turin phak tawk leh theih chinah chak taka kalpui a ni tih Chief Minister chuan a sawi a ni. MMFA hi kum 2009 April ni 4 khan Mizoram buai kaihhnawiha nunna chante zawng zawng huapa din a ni a. Tunah hian chhungkua 2057 awmin, office bearer 11 leh executive member 30 an awm mek tih nimina sorkar thuchhuah chuan a sawi.

MMFA General Assemblyah hian resolution pathum an passed a. Chungte chu Mizoram buai hun chhung March ni 1, 1966 leh kum 1986 June ni 30 inkara martyr chhung ten central sorkarah ex-gratia mi pakhat tan cheng nuai 1 an dil mek tih hlawhtlin sak te, MMFA member te tan an phak ang zela sorkar hna leh chhawmdawlna ngaihtuah sak te a tel a, Assembly ah hian district tin atangin palai engemawzah an kal a, inkhawm hi an President Pu K.Pakunga’n a kaihruai a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram