Zothlifim Logo
Loading ...
Mizoram NewsMizoram News

Nimin chhun dar 1 vel khan Lunglei District chhung Zawlpui khuaah kangmei a chhuak a, In 11 bungrua engmah chuh hman lovin a kangral vek a, mihring thi leh hliam an awm hriat a ni lo.

Kangmei chhuahna hmun hi Zawlpui vengthar a ni a, vengthar hi VC te ram ṭheh thar niin, helai hmunah hian chhungkaw chêng engemaw zat an awm a, vengthar thlang lam, khua nena inzawm deuh mai ram/hnim ro vel chu chhan hriat lohin a kâng vak a, he kangmei si per hian a bul hnaia In, a chung atana di hmang te chu a man kai ta niin an sawi a, in hi inhnaih te te a nih hlawm avangin ṭhelh mih mai theih a ni lova, bungrua engmah chuh hman lohin a kangral ta hlawm a ni.

Kângmei chhuah chhan tak hi chiang taka hriat a ni chiah lova, ṭhenkhatin naupang kuthlei in mei an tih chhuah vang nia an sawi laiin, mi ṭhenkhat chuan Leipui hâlna aṭanga chhuak niin an sawi thung.

In kangte hi chenna in 10 leh Chhang ur-na in pakhat a ni. Chenna In neitute hi thudawnna-in a sawi danin, Neihkima, Barsaia, Moino, Laldinpuia, F.Lalbiaka, F.Lalbiaka makpa, Vanlalsanga, Lallawmt-hanga, Rinnunhlima leh Vuma te in leh Chhang urna in a ni.

Kangmei chhuak avangin mihring thi leh hliam an awm lo a, hetih laiin, vawk vulh lai 3 kang hlumin, eirawngbawlna Gas bur 3 a puak bawk niin kan thudawnna chuan a sawi a ni.

Bialtu MLA Pu Zodintluanga chuan chhiattawkte chu a tuarpui tak meuh tih sawiin, in hi IAY hmanga sa ṭha leh turin ruahmanna a siam nghal a, Lunglei DC Office aṭangin Chhiattawk chhung te `15,000/- theuh leh Silpouline 2 ṭheuh pek a ni a, hei bakah hian DCSO aṭangin Buhfai Qtls. 7 pek nghal niin, Lunglei District Congress Committee (LDCC) pawhin chhiattawk te tanpui nan hian Zawlpui YMA kaltlangin `10,000/- an pe a ni.

Hetihlai vek hian Lunglei Serkawn ram kang chu a la mit chiah loh avangin nimin khan YMA te kangthelh hian an hnatlang chhun-zawm leh a, DFO Kawlhnuna chuan Tui Truck Trip 2 leiin kangthelh nan hmun remchangah an dah a, DFO hian kangthelh tu te thingpui in nan `3000/- a lo pe tawh bawk a ni.